Ia Agavaa e Ulu Atu i le Malumalu

O malumalu o maota moni lava o le Alii. Tatou te osia i totonu o le malumalu feagaiga paia, po o folafolaga, ma le Atua lea e tatau ai mo i tatou e faatasi ai ma Ia i le tikeri e sili ona maualuga o mamalu faalelagi (tagai i le MFF 131:1–4). O nei feagaiga o le malumalu e tau atu i faamanuiaga maoae o loo maua e ala mai ia Iesu Keriso.

E le faapea seiloga ua tatou atoatoa ina ia ulu atu ai i le malumalu. Nai lo lena, o le faamoemoega o mea tatou te aoao ma feagaiga tatou te osia i le malumalu e fesoasoani e faaatoatoaina ai i tatou. Ae peitai, e tatau la, ona tatou agavaa e ulu atu i ai.

O se pepa faataga o le malumalu o se faailoga lea ua tatou agavaa e ala i se faatalanoaga ma se tasi o le au epikopo po o le peresitene o le paranesi faapea foi se faatalanoaga ma se tasi o le au peresitene o le siteki po o le au peresitene o le misiona. O faatalanoaga mo pepa faataga o le malumalu o ni avanoa ia mo i tatou e iloilo ai lo tatou tulaga agavaa. I faatalanoaga taitasi, o le a fesiligia i tatou e o tatou taitai perisitua e uiga i a tatou amio patino ma le faatuatua. O le a tausia e o tatou taitai perisitua nei faatalanoaga ia malupuipuia ma ia lē faalauaiteleina.

Afai ua silafia e o tatou taitai perisitua ua tatou agavaa e ulu atu i le malumalu, o le a tatou mauaina se pepa faataga o le malumalu. Tatou te sainia la tatou pepa faataga e faamaonia ai lo tatou agavaa e ulu atu i le malumalu. E sainia foi e o tatou taitai perisitua la tatou pepa faataga o se molimau faaopoopo i lo tatou agavaa. O lenei pepa faataga e faatagaina ai i tatou e ulu atu i le malumalu mo le lua tausaga e sosoo ai, pe a tumau lo tatou agavaa.

Ua faatulagaina e le Au Peresitene Sili ia fesili e tuuina atu i le faatalanoaga o le pepa faataga o le malumalu. E tutusa fesili mo tagata uma.

O loo i lalo nisi o autu o le a fesiligia ai outou e o outou taitai perisitua:

O lau molimau i le Tama Faalelagi, Iesu Keriso, ma le Agaga Paia.
Pe e te lagolagoina le Peresitene o le Ekalesia.
Pe o e ola i le tulafono o le ola mama, totogi le sefuluai, faamaoni i isi, ma tausia le Upu o le Poto.
Pe o e taumafai e auai i le lotu, tausia feagaiga na e osia, ma tausia lou olaga ia ogatasi ma poloaiga o le talalelei.

Ata o le Malumalu o Bountiful Iuta na pueina e Steve Tregeagle; ata na tusia e Christina Smith, John Luke, Steve Bunderson, ma Matthew Reier; ata o le vai papatisoga o le Malumalu o Vernal Iuta na pueina e Tamra Hamblin