Na Faasaoina e Le Masiofo o Eseta le Nuu o Ieova

Na savali ma le fefe Eseta e agai atu i totonu o le maota tele o Susana. Na tautau mai poutu uumi ia ni fu’a matagofie. O le fola maa e lanu mumu, lanumoana, uliuli, ma le paepae. E oo lava i ipu inu sa faia i le auro. Ona ia iloa atu lea o le tupu o nofo i lona nofoalii maoae.

Na pulea e le Tupu o Asueru vaega uma o Peresia. Na ia poloaiina e avatu tamaitai talavou pito i lalelei o lona malo i lona maota ina ia mafai ona ia filifilia sana masiofo fou. O Eseta o se tasi o na tamaitai talavou lalelei.

Sa tausia Eseta e lona tausoga, o Moretekai, ina ua maliliu ona matua. Na ta’u atu e Moretekai ia Eseta ia aua lava nei ta’u atua i se tasi i le maota o ia o se sa Iuta. Sa talitonu sa Iuta ia Ieova, ae le talitonu ai le tupu.

Ina ua vaai le Tupu o Asueru ia Eseta, sa ia filifilia o ia mai isi tamaitai talavou uma. Sa ia faia o ia ma ana masiofo fou. O lea la o le a ofuina e Eseta ni ofu taugata ma se palealii mamalu. Ae e le mafai ona ia toe foi i lona aiga pe tapuai i le Atua i soo se taimi.

O aso uma lava e sau ai Moretekai i le pa o le maota o le tupu e fia iloa po o manuia Eseta. I se tasi aso, na vaai ai Hamanu, le auauna sili a le tupu, ia te ia. Na faatonuina e Hamanu ia Moretekai ia ifo atu ia te ia. Ae na musu Moretekai. Na o le Atua e ifo i ai o ia.

Sa ita tele Hamanu. Sa ia tau atu i le tupu e le usitai sa Iuta i le tulafono ma e tatau ona fasiotia. Na tuuina atu e le tupu se tulafono ina ia fasiotia sa Iuta uma na i ai i le malo.

Ina ua faalogo le Masiofo o Eseta i lena tulafono le lelei, na ia auina se feau ia Moretekai. O le a le mea e tatau ona latou faia?

Na ta’u atu e Moretekai ia Eseta e tatau ona ia talanoa atu i le tupu ina ia faasaoina ola o tagata sa Iuta. Na ia fai atu e i ai se misiona faapitoa e faatino e Eseta. Atonu sa filifilia o ia e avea ma masiofo ina ia faasaoina e ia tagata o e talitonu ia Ieova.

Sa fefe Eseta. Soo se tasi lava e alu atu i le tupu e aunoa ma le valaauliaina e fasiotia—e oo lava i le masiofo. Sa taumafai Eseta e maua lona lototele ma le faatuatua. Sa ia fai atu ia Moretekai ia talosaga i tagata sa Iuta uma e anapopogi mo ia mo aso e tolu.

Ina ua maea aso e tolu sa ofu Eseta i ona ofu mamalu ma alu atu i le faitotoa o le maota. Na iloa atu e le Tupu o Asueru o ia ma talo atu ia te ia e sau la te talanoa. Na valaaulia e Eseta le tupu ma lana minisita o Hamanu i se taumafataga.

I le taumafataga na ta’u atu e Eseta i le tupu le ala na fuafua ai e Hamanu le fasiotiga o sa Iuta. Na ia ta’u atu o ia foi o se tasi o lo sa Iuta. Sa ita tele le Tupu o Asueru. Sa le mafai ona ia toe aveesea tulafono, ae sa vave ona ia auina atu o e tietie asini ma kamela ma se tulafono fou. Na ta’u atu ai e mafai e sa Iuta ona puipuia i latou mai soo se tasi e taumafai e fasiotia i latou. Na faasaoina ola o le tele o tagata sa Iuta.

Na faamanatuina e tagata sa Iuta mai itu uma o le laueleele le lototele o le Masiofo o Eseta i se taumafataga maoae e taua o le Purim.