O Faamanuiaga o le Malumalu

Ou te manatuaina pea le taimi na ave ai e o’u matua lo matou aiga i le Malumalu a Suisi na faatoa maea, o le malumalu muamua lea i Europa, ina ia avea ma aiga e faavavau. Sa 16 o’u tausaga i lena taimi ma o le uii o le fanau e toafa. Sa matou tootutuli faatasi i le fatafaitaulaga e faamauina i luga o le fogaeleele i le mana o le perisitua, faatasi ai ma se folafolaga matagofie e mafai ona faamauina i matou mo le faavavau. O le a le galo lava ia te au lenei taimi matagofie.

Sa fai si o’u faagaeetia a’o a’u o se tamaitiiti, i lo matou sopoiaina o tuaoi o le atunuu ina ia faamauina o se aiga. Ia te au o se faailoga lea o le ala o loo sopoia ai e le galuega faalemalumalu tuaoi o le lalolagi ina ia aumaia faamanuiaga e faavavau i tagata uma o le lalolagi. O malumalu o Le Ekalesia a Iesu Keriso o le Au Paia o Aso e Gata Ai ua fausiaina moni lava mo le manuia o le lalolagi atoa, e le afaina po o fea le atunuu, aganuu, po o le tulaga faaupufai.

O malumalu o se molimau mautu lea o le a manumalo le lelei. E pei ona saunoa Peresitene George Q. Cannon (1827–1901), Fesoasoani Muamua i le Au Peresitene Sili, “O maa faavae uma e faataatitia mo se Malumalu, ma o malumalu uma e faamaeaina … e tuuitiitia ai le mana o Satani i le lalolagi, ma faateleina ai le mana o le Atua ma le Amioatua.”¹

A o faateleina le uunaiga a le amiotonu i le lalolagi e malumalu taitasi, o faamanuiaga silisili, e moni lava, o le a oo mai ia i latou o e auai moni lava i le malumalu. O iina tatou te maua ai malamalama ma le poto atili ma osia ma le faamaoni feagaiga lea, pe a mulimuli ai, o le a fesoasoani tatou te savavali ai i le ala o le soo. I se faapuupuuga, e aoao mai i tatou e le malumalu e uiga i faamoemoega paia o le olaga ma fesoasoani ia tatou maua lo tatou faasinomaga moni faaletino ma le faaleagaga.

Ae peitai, tatou te lē o i le malumalu mo na o i tatou lava. O taimi taitasi tatou te ulufale atu ai i nei nofoaga paia, o loo tatou faia se matafaioi mamana, o le galuega laveai o le faaolataga ua faaavanoa mai mo fanau uma a le Atua o se taunuuga o le Togiola a le Alo Pele e Toatasi na Fanaua a le Tama. O se auaunaga lē manatu faapito ma le paia lea e faatagaina ai i tatou o ni tagata faitino e auai i le galuega mamalu o le avea ma ni faaola i luga o le Mauga o Siona.

Mo i latou o e le mafai ona auai atu i le malumalu i le taimi nei po o le a lava le mafuaaga, ou te faamalosiau atu ina ia outou faia mea uma i lo outou malosi e umia ai se pepa faataga aoga o le malumalu. O le pepa faataga o le malumalu o se faailoga lea o lo tatou faatuatua ma le naunautai e auauna atu i le Alii. O se faailoga o lo tatou alofa i le Alii, e pei ona aoao mai Iesu, “O le ua ia te ia au poloaiga ma tausi i ai, o ia lea e alofa mai ia te au: o lē alofa mai foi ia te au e alofaina o ia e lo’u Tama, ou te alofa foi ia te ia, ma ou faaali ia te ia” (Ioane 14:21).

A o faaauau pea le faamatagofieina o le vaaiga i le lalolagi i nei maota paia ua faapaiaina mo le Alii, ou te tatalo ina ia tatou faia la tatou vaega o le faalatalata mai o le lagi i le lalolagi e ala i le agavaa e umia se pepa faataga o le malumalu ma faaaogaina. A o tatou faia o lea, o le a mautinoa lava le faateleina o le amiotonu e le gata i o tatou olaga ma aiga ae faapena foi i o tatou nuu ma le lalolagi atoa.