O Le Pu Falani a Lo’u Tuagane

Sa ou tuputupu ae ma faalogo pea i le leo o le pu a lo’u tuagane o loo aoaoina. Mai lea aso i lea aso, i lea tausaga i lea tausaga, sa sau ai le leo o lana pu mai lo matou fale. Sa mafai foi lava ona ou lagonaina mai se mea mamao lava pe a ou savali mai i lo matou fale mai le aoga maualalo.

Pe a luiina, ou te matuai ou mautinoa lava o lo’u tuagane o se tagata pito i sili le lelei o le ilipu nai lo se isi lava. Ae ui i lea, o lona ili sooina sa ou matamuli ai i nisi o taimi, ma e tasi se taimi na ou fai ai i lo’u tina e taofi o ia. E na te aumaia foi a lana pu pe a sau e malolo!

I ni nai tausaga mulimuli ane sa ma i ai ma lo’u tuagane i se tauvaga musika i matu o Kalefonia i le lotoa o se iunivesite tele lava ou te lei vaai muamua i ai. A o ma i ai iina, sa mauaina e le matou vaega o le aufaipese o le aoga maualuga se tulaga maualuga, o lona uiga e tatau ona matou toe faia se faafiafiaga i se taimi mulimuli ane o lena aso. Sa tuuina mai ia i matou ni faatonuga i le mea matou te o i ai ma pe o afea matou te feiloai ai, ona matou taape ai lea. E lei umi ae tuua na o au, tu ai i le ogatotonu o le lotoa ma vaai atu i le maualuluga o fale. Sa ou le iloa atu se tasi ou te masani ai, ae na ou manatuaina le tala a lo’u tina na fai mai ia te au pe a ou leiloa: “Nofo i le mea o loo e i ai.”

Sa ou nofo ae sa ou matua’i matamuli ou te fesili mo se taiala; ma le isi mea, ou te le iloa le mea ou te alu i ai. Sa ou le manatua se mea e tasi sa tau mai ia i matou e uiga i le nofoaga po o fea e feiloai ai. Ae na faafuasei lava ona oo mai se manatu ia te au ou te ole atu i le Tama Faalelagi mo se fesoasoani. I lena taimi sa lei avea au o se tagata o le Ekalesia, ae sa ou auai soo atu i le lotu ma isi au uo o le Au Paia o Aso e Gata Ai ma aoaoina ai e tali mai e le Tama Faalelagi ia tatalo.

O lea sa ou tu ai iina ma tatalo le leoa i lo’u loto. Ae ou te lei fai atu amene, sa laulā o’u taliga. Mai i se mea mamao lava, a o filemu mea uma, sa ou lagonaina se leo masani—o se leo sa ou faalogoina i le tele o taimi o lo’u olaga. A o amata ona ou savali agai atu i le mea o loo sau ai le musika, sa amata ona leotele. Faamata o le pu lea a lo’u tuagane? Sa ou mautinoa lava.

Peitai ona amata lea ona ili mai isi pu. Sa ou le mautonu. Pe na ou manatu ea e mafai ona ou iloa pe o fea o na pu uma o lo’u tuagane? Ae peitai, o taimi uma lava sa ou masalosalo ai, sa ou faalogoina lana pu, e pei o loo faailo mai ia te au. A o ou ulufale atu i se tasi o fale, ma a’e i faasitepu, ma latalata atili atu i le musika, sa tupu lo’u fefe. O le mafaufau i le tatalaina o le faitotoa sese ma mauaina se tasi ou te le iloaina na mu ai ou foliga. Ina ua ou taunuu i le fogafale lona tolu, sa ou toe faalogo tasi lava, faia lau filifiliga, manava loloa, ma tatala le faitotoa. A lea!

E tuuina mai e le Tama Faalelagi Lona Agaga e aoao ai i tatou, molimau mai ia i tatou, puipuia i tatou, ma taitaiina i tatou i le saogalemu pe a tatou lagona le tuua na o i tatou ma tuulafoaiina. Tatou te iloa Lona siufofoga i le faalogoina soo ma faamasani i ai ina ia tatou matauina i le totonugalemu o isi leo lea e tata’ieseina i tatou.

E le tatau ona tatou matamuli i Lona siufofoga pe faatuatuai ona mulimuli i ai. Pe a tatou ole atu i le Tama Faalelagi mo Lana fesoasoani ona faalogo lea, ma sauni e usitaia, ou te iloa o le a tatou lagonaina o Ia.