Ina ua uma le lotu i se tasi Aso Sa, na matou i ai i totonu o le taavale ma lo’u tina, lo’u tuagane, e sauni ai i le fale. Ae na matou le maua le ki o le taavale. Na tuu uma e lo’u tama a matou ato i totonu o le taavale ae savavali ma lo’u tei laitiiti lea na i totonu o le taavale toso. Sa matou sueina le ki i mea uma, ae sa matou le mauaina. Na ou aoaoina mai le Peraimeri ma le afiafi faaleaiga, e tatau ona tatou tatalo i taimi uma tatou te manaomia ai le fesoasoani. Na ou fai atu i lo’u tina e tatau ona matou tatalo ina ia fesoasoani mai le Tama Faalelagi ia i matou. Na fiafia tele lo’u tina, ma sa matou tatalo faatasi. Na faafuasei lava ona oo mai lo’u tina matua i lana taavale ma aumai ia i matou le ki. Na ave sese e lo’u tama le ki ma na toe sau lo’u tina matua e aumai. Ou te iloa na fesoasoani le Tama Faalelagi ia i matou ua auina mai ai lo matou tina matua. E fesoasoani mai pea o Ia i taimi uma lava, e auala mai isi tagata.

Samuel K., 5 tausaga, o Siamani

Na aioi mai Peresitene Monson i fanau uma ia latou fesoasoani i se tasi o loo manaomia. E toafitu le fanau a lo’u tina, ma e ou te fesoasoani ia te ia e faamama le umukuka i taeao taitasi, lea e matua fiafia ai o ia. Ou te fiafia ma lagona foi lona fiafia pe a ou fesoasoani ia te ia. Ou te manatu o le a fiafia Peresitene Monson, ma faapea foi Iesu, o lea ou te fesoasoani i lo’u tina ma usiusitai i ou matua.

Mylena L., 11 tausaga, o São Paulo, Pasila

Ou te iloa na faaliliuina e le Perofeta o Iosefa Samita le Tusi a Mamona. Ou te fiafia i tala ou te faitau i ai e uiga ia Iesu i tusitusiga paia. Ou te iloa e alofa tele Iesu ia te au ma fanau iti uma lava. Ou te fia aoao atili e uiga ia Iesu i le Peraimeri. Ou te fiafia ou te alu i le lotu faatasi ma lo’u aiga i Aso Sa uma. Ou te alofa i lo’u aiga.

Adrial T., 5 tausaga, o Meleisia