Manatu mo Afiafi Faaleaiga
O lenei lomiga e aofia ai tusiga ma gaoioiga e mafai ona faaaoga mo afiafi faaleaiga. O ni nai faataitaiga nei.
“Ia Agavaa e Ulu Atu i le Malumalu,” itulau e 12: E avea o se vaega o le lesona, e mafai ona e talanoaina autu o pepa faataga o le malumalu o loo lisiina i le tusiga. Fai atu i tagata o le aiga e mafaufau loloto i na autu a o e faitauina. Ia uunaia tagata uma ia agavaa e tapuai i le malumalu.
“Mauaina o Oe Lava Ia i le Miti a Liae,” itulau e 26: Toe talanoaina ma lou aiga le tusiga. I le faaiuga, o loo talosaga mai ai Peresitene Boyd K. Packer, Peresitene o le Korama a Aposetolo e Toasefululua tatou te toe faitau le 1 Nifae 8 ma isi fuaiupu o le Tusi a Mamona o loo aoao mai ai le ata o le faaolataga. Mafaufau e faitau nei mau ma manatunatu i le folafolaga ua tuuina mai e Peresitene Packer.
“Na Tuuina e le Alii o Ia i lo Tatou Ala,” itulau e 48: A o e faitauina le tala lenei, valaaulia tagata o lou aiga e faalogologo ona talanoaina lea o le mafuaaga na filifili ai le tamaloa sa i totonu o le taavale e faalogo i lesona a faifeautalai. Ia mafaufau e faatino pe talanoaina auala e galue ai e faapei o le a galue ai le Faaola i ni tulaga eseese.
“O Se Faiaoga e 10-Tausaga,” itulau e 58: A uma ona faamatala atu le tala, mafaufau e valaaulia tagata o le aiga e mafaufau i avanoa i ni taimi e mafai ona avea ai i latou ma faiaoga, ma po o a foi autu o le talalelei latou te mananao e aoao atu. Ina ia tuu atu ai ia i latou se avanoa e faataitai ai ona aoao atu, atonu o le a e manao e fai se faasologa e mafai ai e tagata o le aiga ona aoao atu i afiafi faaleaiga po o isi tulaga.
Molimau Tuputupu Ae—ma Tupe mo Misiona
Ina ua uma ona matou faalogo i taitai o le Ekalesia o faamalosiauina le autalavou e faaputu ni tupe mo misiona talai, sa matou faia loa se afiafi faaleaiga faapitoa ma le ma fanau e toalua, o Alana e 10-tausaga ma Ulric e 7 tausaga le matutua. Sa matou talanoaina le taua o le faaputuina o se tupe mo se misiona talai, ona ma tuuina atu lea ia i laua ni pusa faaputu tupe e fesoasoani e amata ai a laua faaputugatupe.
Ina ua mavae lena afiafi, sa faigata ona talitonuina le vave o le faaputuina o le tupe. O Ulric sa aoina ma teuina sene uma e mafai ona ia maua; sa teuina e i laua uma soo se tupe la te maua mai tagata o aiga. E tolu masina ae ua lava le tupe na teuina e Ulric e totogi ai mo le masina muamua o lana misiona, ma toeitiiti foi oo atu i ai Alana. E faamautinoa foi e tamaiti e totogi ia sefuluai i tupe la te maua, ma ua vaaia e lo matou aiga ni faamanuiaga se tele a o mauaa ma tuputupu ae a laua molimau i le auauna atu ma le ositaulaga.
Luiz ma Andreia Pereira, São Paulo, Pasila
O Lau Afiafi Faaleaiga e Sili Ona e Fiafia i Ai
Auina mai se faamatalaga o lau afiafi faaleaiga e sili ona e fiafia i ai i le liahona@ldschurch.org.