O se Vaaiga mai se Nofoaga Maualuga

Sa tele ni o’u avanoa e faia ai sui papatisoga mo e ua maliliu i le Malumalu o San Diego i Kalefonia a o ou talavou. E ui lava sa ou mauaina i taimi uma se aafiaga lelei, e tasi se malaga na faapitoa lava lona tulai mai i lo’u mafaufau.

Sa 16 o’u tausaga, ae faatoa atoa le 12 o lo’u uso laitiiti ma ua amata lana malaga muamua e faia papatisoga mo e ua maliliu. Talu ai o lona taimi muamua lea, na tonu ai ma te savalivali faataamilo i fafo o le malumalu pe a maea.

E i ai i lotoa o le malumalu ni mati’e i le tasi itu, o lea na ma savalivali ai iina. Ona e tu le Malumalu o San Diego i autafa o se auala saoloto pisi, a e tu la i le mati’e, e te vaai sao lava i lalo i le auala saoloto pisi.

O le tu i nofoaga maualuluga o le malumalu i lena aso na aumaia ai ia te au se vaaiga fou o le olaga. Sa ou vaai ifo i lalo i le lalolagi ma ona taavale femasauai, faleoloa feomai, ma faailoilo o auala ua tumu i tusitusiga.

O le taimi lena na oo mai ai le manatu i lo’u mafaufau: “E te le fia avea ma se vaega o lena vaaiga; e le o le uiga lena o le olaga.” Sa aoaoina pea au o le faamoemoega o le olaga o le toe foi atu e nonofo faatasi ma lo tatou Tama Faalelagi ma avea faapei o Ia. Na ou iloaina ou te le manaomia mea o le lalolagi e faataunuu ai lena faamoemoega.

Na ou faliu i tua ma vaai atu i le malumalu matagofie, ma ou faafetai ai mo le malamalama o le talalelei ma le vaaiga ua tuuina mai ia te au. Na ou iloa i le totonugalemu o le lalolagi fenumia’i ma le taufaasese, sa ou mauaina se nofoaga maualuga ou te tu ai.

Na ou folafola atu i lena aso i le malumalu i lo’u Tama Faalelagi o le a ou tu pea i Lona itu ae le o le lalolagi. E tusa lava po o a mea e fetogi mai e le lalolagi ia te i matou, e mafai ona matou manumalo ai i le tausia lea o feagaiga sa matou osia ma le tumau ai i mea paia (tagai MFF 87:8).