Lotogatasi

O se tasi o faamoemoega autu o le talalelei a Iesu Keriso o le lotogatasi. Ua aoao mai tusitusiga paia o le tulaga laugatasia ma le manatu tasi e tatau ona faatumauina i tagata o le Ekalesia.

O le a outou manatua le po o le Tausamaaga Mulimuli, a o feiloai le Faaola ma Ana Aposetolo, na Ia tatalo ina ia mafai ona tasi i latou ma Ia, e pei ona tasi o Ia ma le Tama. E le faapito Lana tatalo mo na o i latou nei, “a o i latou foi [e] faatuatua ia te [Ia] ona o la latou upu;

“Ina ia tasi i latou uma; faapei o oe le Tama o i totonu ia te au, o au foi o i totonu ia te oe, ina ia tasi i latou i totonu ia te i taua: ina ia talitonu le lalolagi ua e auina mai au” (Ioane 17:20–21).

O le faamoemoega lava i taimi uma ia lotogatasi, ia tasi, ma ia tutusa tagata uma o le Ekalesia a Keriso. O se faataitaiga, ou te toe faatepa outou i le tusi a Enoka, i le ala na mafai ai e ia ma lona nuu ona taunuu i se tulaga o le lotogatasi a o i ai le isi vaega o le lalolagi i le taua.

“Ma sa oo ina oo atu se fetuu i tagata uma o e na faasagatau atu i le Atua;

“Ma sa amata mai i le taimi lena ona latou fetauai ma faamaligi toto; ae sa afio ifo le Alii ma mau faatasi ma ona tagata, ma sa latou mau faatasi i le amiotonu.

“Sa oo ina fefefe nuu uma i le Alii, ona o le mamana tele o le mamalu o le Alii sa i luga o tagata o lona nuu. Ma sa oo ina faamanuiaina e le Alii le laueleele. …

“Ma sa ta’ua e le Alii lona nuu o Siona.” Aisea? “Aua sa tasi o latou loto ma lo latou manatu, ma sa latou ola i le amiotonu; ma sa leai foi se tasi o i latou sa mativa” (Mose 7:15–18; faaopoopo le faatusilima).

I le taimi o Lana misiona faaletino na aoao atu e Iesu le mataupu faavae lava lea i Ona soo. Ina ua mavae Lona Afio Ae i le lagi, “ua tutumu foi i latou uma i le Agaga Paia, ma ua tautala atu i le afioga a le Atua ma le faamalosi.

“Ua tasi lava le loto ma le manatu o e faatuatua uma lava: ua le fai mai foi e se tasi i se isi ana mea o lana lea; a ua tuu tele a latou mea uma” (Galuega 4:31–32).

Ina ua mavae le misiona a le Faaola i sa Nifae, ona “faaliliuina mai ai lea i le Atua le nuu atoa i luga o le fogaeleele uma, o sa Nifae atoa ma sa Lamana, ua leai foi ni fefinauaiga po o feupuaiga ia te i latou, a ua faamaoni tagata uma o le tasi i le isi.

“Ua tuu tele foi a latou mea uma; o le mea lea ua le mauoa ai i latou pe mativa, ua le pologa pe saoloto, a ua tuufaasaoloto i latou uma, ma ua tofu ma le mea foaifuaina mai le lagi” (4 Nifae 1:2–3; faaopoopo le faatusilima).

O le taimi nei o i tatou o le Ekalesia a Keriso, ma e finagalo le Alii ia i tatou ia o mai i lenei lava lotogatasi. Ua fetalai mai o Ia ia i tatou: “Ia tasi; afai e le tasi outou e le a a’u outou” (MFF 38:27).

O nisi o tagata o le ekalesia e manatu e mafai e se tasi ona ogatasi atoatoa ma le agaga o le talalelei, fiafia i le faaaumeaina atoatoa i le Ekalesia, ae le ogatasi ma taitai o le Ekalesia ma fautuaga ma le taitaiga latou te tuuina atu. O lea ituaiga tulaga e matua feteenai lava, aua o le taitaiga a lenei Ekalesia e le gata e sau mai afioga tusitusia ae faapena foi mai faaaliga faifai pea, ma ua tuuina mai e le Alii lena faaaliga i le Ekalesia e ala mai Lana perofeta filifilia. O le mea lea, e mulimuli mai, o i latou o e fai mai ua talia le talalelei ae i le taimi lava e tasi e faitio ma mumusu e mulimuli i le fautuaga a le perofeta, ua faaaogaina se tulaga vaivai tele. O lea ituaiga agaga e taitai atu ai i le liliuese. E le o se mea fou. Sa taatele lava i le vaitaimi o Iesu e faapea foi i le vaitaimi o le Perofeta o Iosefa Samita.

E lelei le manatua o lesona taua na aoao atu e le Faaola i sa Nifae i lenei mataupu ina ua amata Lana misiona ia i latou. Na Ia fetalai atu:

“Aua foi nei i ai se finauga ia te outou, e pei ona i ai i aso ua tuanai atu; pe i ai foi finauga ia te outou i le uiga o a’u mataupu, e pei ona i ai i aso ua mavae atu.

“Aua e moni, e moni ou te fai atu ia te outou, o le ua i ai le agaga o le finauga e le mai ia te au lea, a e mai le tiapolo, o le tama lea o finauga, ua ia faaosoina foi loto o tagata e fefinauai ma ita” (3 Nifae 11:28–29).

O loo i ai se auala e tasi lava e mafai ai ona tatou lotogatasi, ma o lena auala o le saili lea o le Alii ma Lana Amiotonu (tagai i le 3 Nifae 13:33). O le lotogatasi e sau mai le mulimuli i le malamalama mai luga. E le sau mai le vevesi o i lalo. A o faalagolago tagata i lo latou lava poto ma savavali i o latou lava ala, e aunoa ma le taitaiga a le Alii e le mafai ona latou nonofo i le lotogatasi. E le mafai foi ona latou maua le lotogatasi i le mulimuli i tagata lē musuia.

O le ala i le lotogatasi e mo i tatou e aoao le finagalo o le Alii ma faia loa. Seiloga ua malamalama ma usitaia lenei mataupu faavae autu, o le a leai se lotogatasi ma se toafilemu i le lalolagi. O le mana o le Ekalesia mo le lelei i le lalolagi e faalagolago i le tulaga o tausisia ai e i tatou o tagata o le ekalesia lenei mataupu faavae.

O le mafuaaga autu mo faafitauli i le lalolagi i lenei vaitaimi ona e le o sailia e tagata ia iloa le finagalo o le Alii ma ia faia loa. Nai lo lena ua latou saili e foia o latou lava faafitauli i lo latou lava atamai ma a latou lava ala. O le Alii, i le vaega muamua o le Mataupu Faavae ma Feagaiga, lea na Ia faaalia mai o le faatomuaga o le tusi o Ana poloaiga, na tuuina mai ma faailogaina o se tasi o mafuaaga o mala na Ia muai vaaia o le a oo mai i tagata o nofoia le laueleele. Faafofoga mai i lenei folafolaga tagitagi:

“Ua latou o ese mai au sauniga, ma ua solia lau feagaiga faavavau;

“Latou te le saili i le Alii ia faatuina lana amiotonu, a ua taitoatasi le tagata ma savali i lona lava ala” (MFF 1:15–16).

Uso e ma tuafafine, ia le faatonuina e le tagata lona uso a tagata pe faalagolago i le malosi o le tino (tagai i le MFF 1:19), ae saili i le Alii ia faatuina Lana amiotonu (tagai i le MFF 1:16).

E mafai e i tatou o i lenei Ekalesia ona maua le lotogatasi ma le manatu tasi lea o le a tuuina mai ai ia i tatou le malosi e sili atu i lo se isi mea ua tatou fiafia ai pe a tatou mauaina se malamalama lelei o mataupu faavae o le talalelei ma maua ai le lotogatasi ia tatou faauigaga o tulaga ma fesuiaiga o le lalolagi i le taimi nei. E mafai ona tatou faia lenei mea e ala i le suesue ma le agaga tatalo i afioga a le Alii, e aofia ai mea ua tuuina mai ia i tatou e ala mai le perofeta soifua.

O le ala lenei e maua ai se lotogatasi. Afai tatou te suesue i le afioga a le Alii pe a oo mai ia i tatou e ala mai i tusi faavae ma ala mai i faatonuga a perofeta soifua ae ia le faamaaa o tatou loto, ae ia faamaualaloina i tatou lava ma atiina ae se naunautaiga moni ia malamalama i lona aoga ia i tatou i o tatou lava tulaga uiga ese, ona tatalo atu lea i le Alii i le faatuatua, ma talitonu o le a tatou maua ai (tagai i le MFF 18:18), a o tausia ma le filiga i le taimi atoa poloaiga a le Alii, e mautinoa lava o le ala e tatau ona tatou mulimuli ai o le a faaalia ia i tatou, ma o le a mafai ai ona tatou feagai ma le lalolagi o se iunite mautu.

E moni lava tatou te manaomia lenei lotogatasi ma le malosiaga i lenei vaitaimi lea o loo tatou ola ai. E i ai so tatou avanoa maoae, o le avanoa e siitia ai agai i le lagi, ina ia maua ai le agaga o le talalelei lea tatou te lei fiafia ai lava faapea muamua. O lenei mea e mafai ona tatou faia i le atiina ae ia i tatou lava o lena lotogatasi lea e manaomia e tulafono o le malo selesitila. …

O lo’u talitonuga maumaututu lea, ona o loo tatou i ai i le galuega a le Alii, e mafai ona tatou faataunuuina mea uma lava e manaomia e Ia tatou te faia pe afai na o lo tatou lotogatasi lava.