Mo le Toatasi ma mo Tagata Uma

I le konafesi a le autalavou, lea sa faia e latalata i le Malumalu o Frankfurt Siamani, sa faailoa mai ai e tagata uma o le faatumutumuga o le konafesi o le siitiaga faaleagaga lea sa latou maua e ala i aoaoga o le talalelei, auai i le malumalu, ma le fefaasoaai o molimau.

Sa lagona e Benjamin Uhlig e tatau ona tutu faatasi le autalavou i lenei auala. “O i tatou o se nuu, ma o loo tatou tau faatasi i se taimi matua leaga lava. Tatou te o i le aoga, ma e fetosoai solo i tatou i soo se itu. O loo i ai faatosinaga amioleaga i soo se mea. Ae o le autalavou o la tatou lagolagosua lea. O loo tatou tau faatasi iinei o se autalavou mo le galuega a le Alii, ma ia te au lava ia o se mea matua matagofie lava.”

Pe a mafaufau Ida Uhlig i ana uo i le Ekalesia, e na te mafaufau foi i le malumalu. E le mamao lana uarota mai le malumalu, o lea latou te faia sooa ai iina sui papatisoga mo e ua maliliu. “Ou te manatu afai e te filifiliina ni uo, e tatau ona e filifiliina ni uo moni o e o avea foi ma se faataitaiga ia te oe. O uo tou o faatasi i le malumalu, ma e tou maua ai faatasi aafiaga faaleagaga iina.”

“E ese lava le manaia o le faia o papatisoga mo e ua maliliu,” na fai mai ai Micheal Fiedler, “aua, e moni, e te fesoasoani ai i na tagata uma lava. O le malumalu e masani lava ona avea ma faatumutumuga o le konafesi a le autalavou aua e taulai atu i ai mea uma.’

O le malosiaga e maua e nei autalavou mai le tasi ma le isi e faaopoopo lea i a latou molimau o le talalelei, lea e tofotofoina i aso uma i le aoga ma i isi taimi. O se mea masani mo i latou le tatau lea ona tutu atu mo tulaga faatonuina o le Ekalesia.

“Na o au lava le tagata o le Ekalesia i la’u vasega,” o le tala lea a Jonatan Fingerle. “Ma i le taimi nei o soo se mea lava ou te alu i ai, o a’u lava ‘o le Mamona.’ E tatau ona ou talanoa e uiga i ai ma tuu atu la’u molimau i le vasega, i luma o la’u vasega o mataupu faavae, lea e matua leai lava se tasi e talitonu i soo se talalelei. O le mea e lelei ai ina ua maea, e oo lava i le taimi o le malologa, sa o mai tagata ma fesili mai ia te au ni fesili, ma e sa matua mafai lava ona ou faaali atu le molimau sa ia te au.”

O nisi taimi o le tumau ai i tulaga faatonuia o le Ekalesia e mafai ona avea o se aafiaga o le tuua toatasi. O Vincent Newsome e tele lava ina tu toatasi i le tausia o le tulafono o le legavia. “E manatu au uo i le aoga e foliga ese lo’u tumau ai i le mama, aua e le o se vaega lena o o latou olaga, ma na ese le aoaoina o i latou e o latou matua mai le amataga. O nisi o tina na o le ave lava o a latou fanau teine i le fomai e vaaia totoga o fafine pe a 14 i latou ma aumai se talavai mo se aiga fuafuaina mo i latou.”

Ae e iloa e Vincent le mana lea e oo mai mai le tausia o poloaiga a le Alii. “O le ola ai i le tulafono o le legavia e faamalosia ai au. E mafai ona e fiu ai, ae o le a le fesoasoani lava, aua a e fiu ma amio e pei o amio a tagata i le lalolagi, ona pei lava lea ua e ola faasevasevaloa ma ua e le mafaufau i le mea o loo e faia. Ou te iloa e sili atu lou ola mama, aua a le o lea o le a na o lou goto ifo i lalo.”

O ni isi taimi e mafai ona tatou faaliliuina o tatou fili i ni uo, i le tu atu lea i luga mo tulaga faatonuina a le Ekalesia. Ina ua amata o ia i lana aoga, sa sauaina Carina Schultes ma vaai maualalo i ai isi. “Sa le mafai ona latou taliaina la’u lotu, o o’u tulaga faatonuina, lo’u le ulaula, ma lo’u le inu pia. I le taimi muamua lava sa le mafai ona latou gafatiaina, ae laki a ina ua mavae le fa tausaga ua latou taliaina ma e latou te manatu e matuai manaia lava ma ua latou matuai lagolagoina lava au ma ua fai i isi e tuu ai pea au.”

E oo mai le malosi ia i tatou i le tele o auala eseese. E maua e Benjamin Rumbach lona malosi i lana mau e fiafia lava i ai, 1 Nifae 3:7. “E faaalia ai iina le naunautaiga o Nifae ma le lototele lea na ia naunau ia maua mo le talalelei. E fesoasoani ia te au pe a ou manaomia le malosi ia usiusitai ai i poloaiga ma tetee atu ai i faaosoosoga i se auala e sili atu. Ou te iloa e mafai ona ou tausia poloaiga uma pe a ou loto lava i ai.”

Mo Salote Baumann, o le malosi e oo mai i se tulaga o se kata e telē pei o se atotupe Mo Le Malosi o le Autalavou: “O nisi taimi e te le iloa pe faapefea ona e faamatalaina se mea, ae o loo ta’u mai ai iina se mea e uiga i autu uma e talafeagai i le autalavou. Ma o se fesoasoani sili lena. Sa matuai ou matauina lava le taua o lo’u tumau ai pea i a’u mataupu faavae, e tusa lava pe manatu tagata e foliga ese pe latou te le malamalama, ma o le mea lena e faamalosia ai au.’

O le malosi o loo lagona e Ida Uhlig i le konafesi a le autalavou ma i le malumalu e faatumauina ai o ia i luga. “Ou te lagona soo lava le Agaga Paia. I le taimi lava lenei o le konafesi a le autalavou, o loo faatasi le Agaga ma outou, ma e mafai ona e lagonaina i le malumalu. Ou te faafetai mo Iesu, ma e ou te fiafia e toe faatasi ma Ia,” o lana tala lea.

Ma mo Carina Schultes, o le tu mausali ma le tatalo sa faamalosia ai o ia: “Sa ou aoaoina e tusa lava pe tele faaosoosoga o loo siomia ai oe, e le tatau ai lava ona e faavaivai ai. E tatau ona e tu mausali, ma pipiimau i afioga a le Atua ina ia aua nei e pau. I le Mataupu Faavae ma Feagaiga 88:126, o loo ta’u mai ai e tatau ona tatou tatalo e le aunoa. Pe a i ai ni o tatou faafitauli pe manaomia se fesoasoani, o le a tatou mauaina le tali.”

Pe tutu faatasi pe tu toatasi, o loo mauaina e le autalavoua a le Siteki a Frankfurt Germany le malosi i le talalelei a Iesu Keriso. Ma o lenei malosiaga o le a tumau ai mo i latou mo lo latou olaga atoa.