Seminare po o le Taaloga?

Ina ua amata la’u aoga maualuga, sa ou auai i le au afeleti a la’u aoga. O le tamoe sa fai ma a’u mea fiafia—sa avea au o se tagata tamoe talu mai le iva o ou tausaga—ma sa ou galue malosi i ai. Sa ou auai i faatasiga o toleniga a itiiti ifo o le faatolu i le vaiaso i afiafi. Sa ou maua foi le avanoa e avea ai ma sui mo lo’u nuu o Costa Rica i taaloga faaleitumalo.

O le tele o taimi, e faia a matou toleniga seia leva le po. Sa avea ai le ala i luga mo le seminare i le vaveao, lea sa amata i le 5:00 i le vaveao, o se luitau faaopoopo, ae sa faaauau pea ona ou faia lena osigataulaga.

Ae peitai, i le afa o lo’u tausaga i le aoga maualuga, i le 16 o ou tausaga, na ou iloa ai e lei tuuina atoa lo’u loto i le seminare. Sa ou alu, ae sa le lava lau malolo, sauniga, pe faalogo lelei e pei ona tatau ai. Sa ou iloa ai foi le aafia o la’u faatinoga faaletino e ala i lou vaivai i le tuai ma le alapo i vaveao, ma sa le fetaui lea mo la’u ‘au.

E ui lava sa faamanuiaina pea au i le auai i le tele o gaoioiga ma na mafai lava ona fetuunai le lotu, aoaoga, ma taaloga seia oo i lena taimi, ae ua ou le toe lagonaina se paleni. Sa amata ona ou mafaufau pe i ai se mea e tatau ona ou tuua. O le tamoe o se gaoioiga lelei, maloloina, o se tasi o mea sa ou lelei ai. O se avanoa mo au e faaaoga ai au taleni ma faatulaga se mamanu o le loto pulea. Ma i la’u aoga, o le avea ai ma se tagata taalo sa taua. Sa i ai ni au uo lelei i la matou au, ma afai ou te tuua, o le a ou misia na fegalegaleaiga.

I le isi itu, sa i ai sa’u sini e faauu mai le seminare, ma na ou iloa afai ou te nofo ai pea i le au, o le a le mafai ona ou faia lena mea.

A o ou iloiloina la’u faaiuga, sa ou mafaufau po o le a le mea o le a sili ona aoga i vaega uma o lo’u olaga, e aofia ai lo’u i ai i le aoga maualuga ma mo lo’u olaga atoa. Sa ou mafaufau i au sini mamao. Sa ou iloa o la’u amio faaalia e uiga i le seminare sa i ai se taunuuga mo lo’u olaga atoa—mo le faavavau, moni lava. Sa ou iloa le mea e tatau ona ou faia.

I le faaiuga o lo’u tausaga lona lua i le aoga maualuga, na ou ta’u atu ai i lo’u faiaoga ma le matou au taalo o le a ou le toe auai i le au. Sa faateia i latou. E leai se tasi na malamalama pe aisea o le a ou tuua ai le mea na ou fiafia ai e tamoe faatauva—o se mea na ou faia mo le toeitiiti afa o lo’u olaga—“ina ia ou alu i le lotu i le 5:00 i le vaveao.” Sa ou faamalamalamaina ia i latou o lo’u tiutetauave lea ma faamuamua ma i le filifiliina o nei mea sao, o le a avea ai au ma se tagata e sili ona fiafia. O le mea e laki ai, e ui lava sa lei malamalama i latou i lau filifiliga, ae o le toatele o le matou au sa faatauaina.

I le lua tausaga na sosoo ai i le aoga, sa tele atu ou taimi e faitau ai tusitusiga paia ma mafaufau i ai. Aua sa ou le faanatinati i le tele o taimi, sa ou mauaina musumusuga i taimi uma. Na aumaia e na mea i lo’u olaga le paleni, filemu, ma le fiafia lea ou te lei oo lava i ai muamua.

I le faaiuga o le aoga maualuga, sa ou faauu ai i le seminare. Sa maoae le aoga o lena taui mo au. Sa ou maua le fiafia i tusitusiga paia ma tala ma lesona na aofia ai, na ou aoao i le amio pulea i le alapo i le vaveao, ma na faamanuiaina au i ni faauoga lelei lea na faamalosia e ala i na itula o le vaveao na matou faaaluina faatasi i aso taitasi. Ae sili ona taua, na ou aoaoina mai le seminare e faamautinoa lo’u faamuamua o le Alii.

O lena mamanu o loo faaauau pea ona faamanuiaina ai lo’u olaga i le taimi nei a o ou aoga i le iunivesite. Ua sili atu ona faigata au vasega nai lo le mea sa i ai i le aoga maualuga. Ua tele atu ou tiutetauave i le ekalesia. Ae ona sa ou faatuina se mausa o le faamuamua o le Alii, ua faigofie ai la le faaauauina pea o le faatulagaina sao o mea e faamuamua, ma e ou te faamoemoe o le a mafai ona ou faaauauina pea lena mamanu mo lo’u olaga atoa.