O Iesu Keriso O Le Alo o le Atua, ma o Ia O Se Atua o Vavega

E faaaogaina e le toatele o tusiata lo latou atamai ma le faatuatua ia Iesu Keriso ma o latou tomai ma vaaiga faalemafaufau e fatu ai ni ata tusi o Ia. O a latou ata tusi e mafai ona fesoasoani e faatupulaia ai lo tatou faatuatua ma le malamalama ia Iesu. Pe a tatou faitau i tusitusiga paia, e mafai ona tatou faaaogaina a tatou vaaiga faalemafaufau, e pei ona fai e tusiata, e fesoasoani tatou te malamalama ai i aoaoga a Iesu.

I le feagaiga Fou o le a e maua ai tala i vavega sa faatinoina e Iesu a o Ia soifua ai i lenei lalolagi. O se tasi o nei vavega o i le Mareko 4:35–39. Faitau le tala; ona vaai faalemafaufau lea sa outou i ai faatasi ma Iesu ma Ona soo i le vaa i le Sami o Kalilaia. Vaai faalemafaufau i se afa maoae. O loo taumalua solo le vaa i i ma o, ua agi malosi le matagi, ma ua pisi ane le sami i ou autafa. Vaai faalemafaufau po o le a lou mafaufau ma ou lagona. Ia vaai faalemafaufau la i le vaai atu i le au soo a o latou fafaguina Iesu. Mafaufau pe na faapefea le leo o le siufofoga o le Alii ina ua Ia ala a’e i luga ma fetalai atu, “Faalologo ia, ina malu ia.” Vaai faalemafaufau i foliga o le sami ina ua taofia le agi o le matagi ma le ofo o le au soo ina ua usitai le sami ma le matagi ia Iesu.

E faapefea i lou faitauina ma mafaufau i lenei tala ona fesoasoani ia te oe e faateleina lou faatuatua ia Iesu Keriso.

E mafai foi ona avea i tatou ma tusiata ma faaalia lo tatou faatuatua ma le malamalama ia Iesu i le tusiaina o ata o vavega sa Ia faatinoina ma i le faaaoga o a tatou ata e aoao atu ai isi i mea ua tatou aoaoina.