O Lo Tatou Tiutetauave ina Ia Agavaa mo Tapuaiga Faalemalumalu

Suesue i lenei mataupu, ma pe a talafeagai ai ia talanoaina faatasi ma tamaitai o loo e asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga.

Ata

Relief Society seal

Faatuatua • Aiga • Toomaga

Mai Tusitusiga Paia

Isaia 2:2–3; MFF 109:22–23; 110:8–10

“O feagaiga tatou te osia ma sauniga e o faatasi ai, ia tatou te maua i le malumalu e avea ma o tatou tusi faamaonia aloaia o le agavaa mo le taliaina i le afioaga o le Atua. O nei feagaiga e siitia ai i tatou i talaatu o tuaoi o o tatou lava mana ma vaaiga. Tatou te osia feagaiga e faaali atu ai lo tatou tuuto i le fausiaina o le malo. E avea i tatou ma tagata o le feagaiga a o tatou osi feagaiga ma le Atua. O faamanuiaga folafolaina uma e a tatou ia e ala i lo tatou faamaoni i nei feagaiga. …

“O a mea e mafai ona fai e tamaitai o le Ekalesia e maua ai faamanuiaga o le malumalu?

“E ala mai i Ana perofeta, ua valaaulia ai e le Alii i latou o e e lei mauaina faamanuiaga o le malumalu ina ia faia soo se mea e manaomia e agavaa ai mo le mauaina o faamanuiaga. Na te valaaulia i latou o e ua uma ona maua nei faamanuiaga ina ia toe foi atu pea e le aunoa pe a mafai ina ia toe olioli ai i le aafiaga, ia faateleina la latou vaaiga mamao ma le malamalamaaga i Lana fuafuaga e faavavau.

“Ia tatou agavaa e maua se pepa faataga o aoga i le malumalu. Ia tatou o atu i le malumalu e faamau o tatou aiga mo le faavavau. Ia tatou toe foi atu e le aunoa i le malumalu pe a faatagaina e o tatou tulaga. Ia tatou tuuina atu i o tatou aiga ua maliliu le avanoa e maua ai sauniga o le faaeaga. Ia tatou olioli i le malosi faaleagaga ma le faaaliga tatou te maua a o tatou auai atu e le aunoa i le malumalu. Ia tatou faamaoni ma ia osia ma tausia feagaiga o le malumalu ina ia maua ai faamanuiaga atoatoa o le Togiola.”¹

Silvia H. Allred, fesoasoani muamua i le au peresitene aoao o le Aualofa.

Mai lo Tatou Talafaasolopito

Na aoao mai Peresitene Gordon B. Hinckley (1910–2008) e faapea o le Aualofa na tupu mai i le manao o tuafafine e tapuai i totonu o malumalu:

“Ao fausia le Malumalu i Katelani na valaaulia tamaitai e nutililiiina a latou ipu omea ina ia faafefiloi ma le sima e teu ai le puipui o le malumalu, lena e mafai ona taia ai le susulu o le la ma le masina ma lafoia ai lena malamalama ina ia faamatagofie ai le foliga mai o le maota.

“I na vaitaimi, a o utiuti lava tupe ae tele naua le faatuatua, na tuuina atu e alii faigaluega lo latou malosi ma mea na maua i le fausiaina o le maota o le Alii. O fafine na faia a latou meaai, o meaai sili na mafai ona latou saunia. Na lipotia mai e Edward W. Tullidge a o suiina e fafine veli o le malumalu, na saunoa atu Iosefa Samita, a o matauina i latou, ‘Tuafafine e, o outou lava e tapa atu i ai e le aunoa. O tuafafine lava e muamua ma taulamua i galuega lelei uma. O Maria lava na muamua taunuu i le tuugamau e vaai i le Alii toetu; ma o tuafafine foi o le taimi nei ua muamua galulue i totonu o le malumalu.’ …

“E faapena foi i Navu, ina ua fausia le malumalu, na faapotopoto faatasi ni nai tina e suiina ofutino mo tamaloloa na galulue. Ma o tulaga faapenei na potopoto ai i latou e toa luasefulu i le Aso Tofi, 17 o Mati, 1842, i le potu i luga o le faleoloa o le Perofeta.”²

O Le a se Mea e Mafai ona Ou Faia?

O le a se lagolagosua e mafai ona ou ofoina atu i o’u uso e saunia ai ma o atu i le malumalu?
E mafai faapefea ona ou faataitaia le talatuu o tamaitai anamua o e na ositaulaga ina ia mauaina faamanuiaga o le malumalu?
E mafai faapefea ona ou mauaina faamanuiaga o le malumalu?

Taumatau: ata o le Malumalu o Oquirrh Mountain Iuta na pueina e Christina Smith