O Le Mamanuina o Faifeautalai o le Lumanai

I le avea ai ma se tagata o le Uarota a Milwaukee Wisconsin, sa taitaiina au e ni taitai tuuto. O a matou gaoioiga o ni punaoa matagofie lea mo le atiina ae o tomai mo sootaga faaagafesootai, ma fesoasoani ia i matou e foia ni lagona lē to’a o vaitausaga talavou. Ae peitai, e tasi se aafiaga o le mutuale na suia faapitoa ai lava le ala o lo’u olaga talavou. Sa tupu i le 1956, i le 54 tausaga talu ai! Ae e oo lava i le aso e manino lava lo’u manatuaina.

Sa galulue faatasi i matou o alii talavou i le taimi o le Mutuale i Aso Lulu taitasi e fausia se faatusa o le Malumalu matagofie o Sate Leki, e fa-futu-le-maualuga (1.2-m). Na matou mamanuina foi se pepa lautele o loo i ai se savali o loo faamatala auiliili ai le faamoemoega o le tala o le Tusi a Mamona.

Na mauaina e Tama Sikauti o le matou uarota se laulau faapitoa mo le faaaliga faaletausaga o tomai Faasikauti i lo matou aai. E faitau selau le au asiasi sa latou savalia autafa o le matou tamai potu sa maimoaina a matou faaaliga. E toatele na tutu. Sa latou fesiligia alii talavou o le Perisitua Arona sa fai togiga o le Sikauti i le faamoemoega o le faaaliga o le malumalu. O le toatele na fesili i lena taimi e uiga i le Tusi a Mamona. Sa faamalamalamaina e i matou talavou e umia le Perisitua Arona i le mea sili matou te mafaia ma tuu atu ia i latou se tusi faavaa vaivai o le Tusi a Mamona.

Sa ma lagona ma se uo Sikauti pele (sa ma i ai faatasi i le korama o aoao) le pei o ni faifeautalai ua tai 20 o ma tausaga! Sa ma tautino atu ma le leleoa ina ia agavaa ma auauna atu o ni faifeautalai faamisiona. Na iu lava, ina ma faia lena mea—faafetai, i le vaega, o le Mutuale ma taitai tuuto o le autalavou.