E tatau ona tatou faalogo i afioga uma a le Alii o loo fofogaina mai e Ana perofeta.
“O le mea lea ua fai atu ai au le Alii ua ou fai atu ai lava, ma ou te le faatoese ai lava au; ma e ui ina mavae atu le lagi ma le lalolagi, a e le mavae atu lava la’u upu, a o le a faataunuuina lava, pe fai atu i lo’u lava leo po o le leo o a’u auauna, ua tusa lava ia.”
O le mea ua fai atu ai A’u le Alii
O ni isi nei o mea na aoao mai e tusitusiga paia ia i tatou e uiga i faaaliga mai le Atua:
“A leai se faaaliga, e faasalalauina le nuu” (Faataoto 29:18).
E le faia lava se mea e le Alii o Ieova ae faaalia Lona finagalo i ana perofeta (tagai i le Amosa 3:7).
E tuuina atu e le Atua i ana fanau le upu ma le upu, o le fuaiupu ma le fuaiupu (tagai i le 2 Nifae 28:30; MFF 98:12).
Soo se mea lava e tautala mai ai auauna a le Atua pe a musuia e le Agaga Paia o le siufofoga lava lea o le Alii (tagai i le MFF 68:4).
E le mavae atu lava la’u upu.
O valoaga ma faamanuiaga o loo fofogaina e perofeta a le Alii e le faataunuuina i taimi uma lava i le taimi ma le ala e manaomia e tagata. Mafaufau i ni faataitaiga o valoaga ma faamanuiaga lea na faataunuuina i se taimi e lei fuafuaina po o se auala e le i fuafuaina, ma tusi i lau api o talaaga pe mafai faapefea ona faatatau lenei mataupu faavae i lou olaga.
Pe mai lo’u lava leo po o le leo o a’u auauna.
Ata
Elder M. Russell Ballard
“E le o se mea itiiti, uso e ma tuafafine, le i ai o se perofeta a le Atua ma i tatou. O faamanuiaga maoae ma le matagofie lea e oo mai i o tatou olaga a o tatou faalogo atu i afioga a le Alii ua tuuina mai e ala mai ia te ia. … Pe a tatou faalogo i fautuaga a le Alii ua faailoa mai e ala mai saunoaga a le Peresitene o le Ekalesia, e tatau ona mautinoa ma vave a tatou tali. Ua faaalia mai i le talafaasolopito e i ai le saogalemu, filemu, manuia, ma le fiafia i le tali atu i fautuaga faaperofeta e pei ona faia e Nifae o anamua: ‘Ou te alu ma fai ia mea ua poloaiina e le Atua’ (1 Ni. 3:7).”
Elder M. Russell Ballard o le Korama a Aposetolo e Toasefululua, “O Lana Upu O Le A Outou Talia,” O Le Liahona, Iulai 2001, 80.
Ou te le faatoese ai lava au
Ata
President Gordon B. Hinckley
“Pe a tauemu le au faitio, pe a faifai mai fili, pe a ta’ufaatauvaaina e tagata masalosalo lenei galuega, ona oo mai lea i lo’u mafaufau o lenei faamatalaga ofoofogia a le Silisili Ese. E le faatoese mai le Alii i mea e fetalai mai ai o Ia pe ua Ia faia. E tausia lava folafolaga uma, ma faataunuuina valoaga uma.”
Peresitene Gordon B. Hinckley (1910–2008), “The Order and Will of God,” Tambuli, Aok. 1989, 3.