Lalagaina Faatasi o o Tatou Loto

Sa valaauina au ou te tootuli faatasi ma se aiga i le taimi o le a momoe, a o avea au ma se malo i lo latou fale. Sa talosaga le tamaitiiti pito i laitiiti lava e tatalo. Sa ia tatalo mo tagata uma lava o le aiga, i o latou igoa. Sa pupula o’u mata mo sina taimi e tilotilo ai i mata o isi tamaiti ma matua. Sa mafai ona ou iloa le tuu faatasia o lo latou faatuatua ma o latou loto i le tatalo a lenei tamaitiiti laititi.

E tuuina mai le vavega o le lotogatasi ia i tatou a o tatou tatalo ma galulue i ai. O le a lalagaina faatasi o tatou loto i le lotogatasi.

Ua tatou faitauina i le Mosaea: “Na ia poloai atu foi ia aunoa i latou ma fefinauaiga, a ia latou faamoemoe i le mea e tasi ona ua tasi le faatuatua ma le papatisoga ua tasi, ma ua fusifusia faatasi o latou loto i lotogatasi ma le fealofani” (Mosaea 18:21).

E tele mea e tutusa ai le fanau a le Atua nai lo mea latou te eseese ai. Talanoa i mea lelei e uiga i le tasi ma le isi. Atonu e te manatua le faapea mai o lou tina—na faapena au—“Afai e leai se mea lelei e mafai ona e talanoa mai ai e uiga i se tagata, aua lava nei faia se tala.” E mafai ona ou folafola atu le lagona o le toafilemu ma le olioli pe a e tautala ma le agalelei e uiga i isi.

Ou te tuuina atu la’u molimau ma le faamaoni o loo soifua le Atua le Tama. E faafofoga o Ia ma tali mai i a tatou tatalo. O loo soifua le Faaola o Iesu Keriso ma o loo ia aapa mai ia i tatou i le alofa. O Lana Ekalesia moni lenei. O Peresitene Thomas S. Monson o se perofeta soifua a le Atua. O le a tatou fetaomi atu ma le mana i soo se mea o loo finagalo le Atua tatou te agai i ai ma avea ai i tatou, pe afai tatou te lagolagoina o ia ma o tatou loto, ma le naunautai ia usiusitai.