Taliaina o le Valaaulia

O se tasi o gaoioiga e sili ona manatuaina lea na ou auai a o talavou o se faaaliga siva tele. Sa ou matua mautinoa lava ou te le taitai lava ou volenitia mo sea gaoioiga faapea. Ae peitai, faatasi ai ma sina uunaiga lemu, sa ou taliaina le valaaulia e auai, e ui o le taimi muamua sa ou le fiafia i lea manatu.

Sa tele ni a matou faataitaiga, ma o le aoaoina o siva sa avea o se faagasologa alualu lemu. Ou te faafetai mo ni faiaoga tuuto, mo se paga siva e onosai, ma mo lo’u tina, o le na suiina la’u togiga ma uunaia au e faia le mea sili.

Na faia le faafiafiaga i le fale matamata mo lakapi. Ou te lei auai muamua lava i se faafiafiaga tele faapea. Sa faafiafia e vaega taitasi le au maimoa a o matou faatinoina ni siva na mamanuina i ni togiga felanulanuai. Ona faatumulia lea o le malae taalo i tagata sisiva a o faatinoina faatasi e i matou uma se siva faaiu. Sa avea o se faafiafiaga mataina.

Sa sili atu lou fiafia i lena faafiafiaga o siva nai lo le mea na ou mafaufau i ai. Na tuuina mai ai ia te au se vaaiga i le Ekalesia e ese mai ai. Sa ou vaaia le toatele o le autalavou o loo mauaina se taimi maoae. Sa ou feiloai i ni uo fou, sa ou atiina ae ni tomai fou, ma sa ou faatinoina sina vaega itiiti o se faafiafiaga tele lea na faafiafiaina le faitau afe.

Ona sa ou taliaina le valaau e siva i lena faaaliga—ma isi valaaulia na oo mai ia te au i le Ekalesia—ua faamanuiaina lo’u olaga, ma ou maua le avanoa e faamanuiaina ai isi. Ua ou lagona le faamanuiaina i le mauaina o le tele o ni aafiaga matagofie i le avea ai ma se tasi O Le Ekalesia a Iesu Keriso o le Au Paia o Aso e Gata Ai.