Ou Te Mimita ia te Oe

A o avea ma faifeautalai faamisiona i Ghana, matou te tālimaina o matou lavalava i aso sauniuni. O la’u soa o Elder Moss, o lē faatoa taunuu mai le Iunaite Setete, e lei oo muamua i le tatāina faapea o lavalava. Ae i le avea ai o se tagatanuu o Kana, ua ou masani ai.

O Aso Gafua uma e agai ai Elder Moss e olo ona lavalava, ae pe tusa e afa lana tagamea, ae amata ona tafetotoi ona lima. Ona manaomia lea ou te faia lana tagamea, e faaopoopo atu ai i le faamaeaina o la’u lava tagamea.

Sa foliga popole Elder Moss i se tasi o Aso Gafua, ina ua oo i le taimi e fai ai le tagamea. Na lavea lo’u lima i le aso na tea, ma na ia iloa o le a le mafai ona ou fesoasoani ia te ia i lana tagamea. E oo lava i la’u tagamea o le a le mafai ona ou faia. Na amata lana tagamea, ae e pei ona masani ai, na ia manaomia se fesoasoani ina ua afa [lana tagamea].

Talu ai ua le mafai ona ou fesoasoani i lau soa i lana tagamea, sa ou faamalosiau ia te ia ia tumau ai—ia faamalolo ona lima ma toe taumafai. Na ia malolo mo se taimi ona toe faaauau ai lea. Sa ou tau atu ia te ia e mafai ona ia saili se auala e faamaea ai. Sa tiga pea ona lima, ae sa ia faamalosi pea. Ina ua maea le tagamea, sa ia faapea mai, “Ua ou mimita a ia te au lava ia. Elder Asante, e te mimita ia te au?”

“Ioe, o lea lava ou te mimita ia te oe,” o lau tali lea.

Ao ou mafaufau i lena mea na tupu, ua ou iloa ai e silafia e le Tama Faalelagi o tatou gafatia, ae na te suesueina i tatou ina ia mafai ona tatou atiina ae le filiga, onosai, ma le faatuatua. E fiafia o ia ia i tatou pe a tatou faia ni filifiliga sao ma tautino atu tatou te mafaia ona taulimaina o tatou mafatiaga.

Pe a tatou galulue malosi ma tumau ai i faigata ua tuu mai i o tatou luma, e mafai ona tatou faapea atu, “Tama Faalelagi, ua e mitamita mai ea ia te au?” Ou te iloa e matua fiafia le Tama Faalelagi ma Iesu Keriso pe a tatou tumau ma o le a La fetalai mai ia i tatou i se aso pe a La toe faafeiloaia mai i tatou.