O Le Ata o le Faaolataga

Ae tatou te lei fananau mai, sa tatou mau faatasi ma le Tama Faalelagi o ni Ana fanau faaleagaga. Sa tatou talia Lana fuafuaga ina ia mafai ona tatou o mai i lenei lalolagi, mauaina se tino, ma ia suesueina. Na auina mai e le Tama Faalelagi Lona Alo, o lo tatou Faaola, o Iesu Keriso, ina ia manumalo mai le oti ma togiolaina a tatou agasala. E ala i le mulimuli atu ma le faatuatua i le fuafuaga a le Tama Faalelagi, ua mafai ai ona tatou toe foi atu ia te Ia. (Tagai i le Aperaamo 3:23–28.)

Sa tatou mau faatasi ma o tatou matua faalelagi i le muai olaga. O le mea e faanoanoa ai, o le tasi vae tolu o fanau agaga a le Tama Faalelagi e lei taliaina Lana fuafuaga. Sa latou filifili e mulimuli ia Satani, lea na taua i lena taimi o Lusifelo. E lei manao Lusifelo tatou te faia ni a tatou lava filifiliga. Sa tauina se taua o mafaufauga i le lagi, ma sa tuliesea ai Lusifelo ma e na mulimuli ia te ia. Ua e i ai i le lalolagi ona sa e filifilia le fuafuaga a le Tama Faalelagi. (Tagai i leFaaaliga 12:7–9.)

Ina ua tatou o mai i le lalolagi, ua tatou maua ni tino, nonofo ai i ni aiga, ma tofo ai i le olioli a o tatou mulimuli i le fuafuaga a le Tama Faalelagi mo i tatou. A o tatou i ai iinei, e manaomia lo tatou mauaina o sauniga lea e fesoasoani ai i le tatou toe foi atu i le Tama Faalelagi: o le papatisoga, faamauina, faauuga o le perisitua mo alii talavou, ma sauniga o le malumalu, e aofia ai le faaipoipoga faaselesitila. E fesoasoani le Agaga Paia e taitaia i tatou i le faia o le mea sao a o tatou nonofo ese ai mai lo tatou aiga faalelagi. (Tagai 2 Nifae 32:5.)

Pe a oti lou tino, o le a faaauau pea ona ola lou agaga, ma o le a alu i le lalolagi o agaga. O le lalolagi o agaga o se nofoaga matagofie lea o le a toe faatasia ai oe ma tagata o lou aiga o e ua maliliu foi. Sa faamatalaina e le perofeta o Nifae le lalolagi o agaga o se “mea e mapu ai, o le mea e filemu ai” o e amiotonu (Alema 40:12).

E ala i le Togiola a Iesu Keriso, o le a toetutu tagata uma. O le Toetu o le toe tuufaatasia lea o lou tino ma le agaga. Pe a maea se vaitaimi o le filemu e ta’ua o le Meleniuma, o le a faamasinoina e le Alii tagata uma, ma o le toatele o tagata o le a ulu atu i se tasi o malo e tolu: o le telesitila, terasitila, po o le malo o le selesitila. O tagata amioleaga o e na faasagatau ia Iesu Keriso ma teena le Agaga Paia o le a auina atu i se nofoaga e ta’ua o le pogisa faavavau. (Tagai i le 2 Nifae 9:15; Alema 40:11–12.)