Tuuina atu o se Lauga Anoa

O le tele o lo tatou naunautai e uiga i le talalelei, o le tele foi lea o le iloa mai e isi o lo tatou naunautaiga loloto ma maua ai se manao e fia oo foi i ia lava lagona. I le isi itu, afai o a tatou lauga—ae maise lava i le amataga—e tumu i faatoesega po o faamatalaga lē lelei, atonu tatou te tuuina ai i tatou lava i lalo, faaitiitia le taua o la tatou savali, ma faaonoono ai i le Agaga. E ala i le fiafia ma le naunau e faasoa atu la latou savali—le savali a le Alii—o failauga e to’a e faamanuiaina isi.

Pe a tatou faasoa atu se tala mamana po o se aafiaga patino, o le a umi se aafiaga o la tatou savali i a tatou tagata faalogologo. E fiafia tagata e faalogo i tala. O le mea lena e vave ēa ai i luga ulu ma faateleina le gauai mai pe a tatou faasoa atua.

Ua tatou oo uma lava i ni mea na tutupu e le galo. E na o se fatufatu meafou lava ma le malosi e faamanaia ai le faamatalaga o se tala. Afai tatou te le manatua se tala patino talafeagai, e mafai lava ona faasoa atu se tala mai mekasini a le Ekalesia.

Pe a faasoaina atu ni aafiaga patino, o failauga mataalia:

• E faataitaia muamua le faamatalaina o a latou tala ia aua ai nei o latou faitaua ma ia mafai ai ona pulatoa atu i le aulotu.

• Ia faapupuu a latou tala ma ia mananaia.

• Fesuisuiai le malosi o o latou leo ma ia avatu ai lagona.

• Faamatala atu ai ni auiliiliga felanulanuai pe a talafeagai.

• Ia faaalia se aga malie i nisi o taimi ae ia malamalama e le o lauga uma e manaomia ai se tala malie.

• E tuuina atu lo latou faamoemoega autu i le faaiuga o tala taitasi.

O afioga a le Alii ma Ana auauna e aoao, musuia, taitai, ma faaosofia. Pe a mafai ona tatou faaolaina mai a latou upu ia tatou lauga, e mafai ona tatou faaafia isi i se auala lelei ma le maoae.

Pe a sii mai ni mau ma upusii, o failauga lelei:

• E faasoaina atu le mafuaaga ma le talafaasolopito o mau ma upusii e fesoasoani ai i e faalogologo ia malamalama i lo latou taua.

• Ia taulai atu tau lava o ni nai mau laiti ma upusii.

• Faamamafa vaega taua.

O le lauga atu i le mana o le Agaga Paia o le ala sili lea ona taua e mafai ona tatou fesootai ai. E pei ona matauina e Nifae, “Pe a tautala atu le tagata i le mana o le Agaga Paia, e moliooina ai i le mana o le Agaga Paia i loto o le fanauga a tagata” (2 Nifae 33:1).

E agavaa i tatou mo lena aafiaga pe a tatou anapopogi, tatalo, ma sauni ma le maelega mo a tatou lauga. Ae afai ua saunia lelei i tatou, o le a tatou le matatau ai lava (tagai MFF 38:30).

I le tuufaatasia o le faatasi mai o le Agaga Paia ma le naunautai, faamatalaina o tala, mau ma upusii, ona faaopoopo lea i ai o a tatou molimau o mea moni ua tatou faasoa atu, o le a siitiaina ma musuia.