Fesuiai Lo’u Fefe mo le Alofa

Sa ou vaai o tietie o ia i le pasi i aso uma a o ou agai atu i le fale mai le iunivesite. E masani lava ona ia ofuina le Mitiafu tele e tasi, seevae taalo ua masaesae, ma ataata. Ma e masani lava ona nofo na o ia lava. Sa avea o ia o se pasese faapitoa, e ui, sa luitauina o ia faalemafaufau.

Sa musuia au i aso uma e le Agaga ou te faatalofa atu ia te ia. Ae peitai, e taofia lava au i aso uma lava, e lo’u faamaualuga. Atonu na ou fefe nei iloa mai au e se tagata o loo fesootai ma se tasi e ese mai lava mai tagata uma. E le gata i lena, sa i ai so’u tulaga e tausisia.

I se tasi o aoauli o le taumalulu, ina ua matuai malosi lava le Agaga ma ua fai sina maoae atu o lo’u lototele, sa ou oso i luga o le pasi, ma iloa atu o ia i lona nofoaga masani, ma ou nofo ifo ai i lalo i ona autafa—e le latalata tele nei tei ua ou palaai. Ina ua ou toeitiiti oo i le mea ou te nofo ai, sa moeiini ou mata, ma faia se tatalo le leoa, ma liliu atu ia te ia.

“Malo,” Na ou fai atu ai i se leo le mautonu ae fiafia, “O A’u o Ashley.”

Ina ua ia ata mai ia te au, na vave lava ona mou atu lo’u fefe ma lo’u faamaualuga.

“O A’u o Lenny,” o lana tali mai lea ma le matamuli.

Mai na upu e le tele, sa amatalia ai se ma sootaga faaleuo.

O le aso na sosoo ai sa ou toe nofo i autafa o Lenny, ae sa faigofie atu—sa avea i maua o se uo. A o ou nofo i lalo, sa ia aapa i totonu o lana atofaafafa ma aumai i fafo se kata o le Aso o le Valentine na faia lava e ia. Sa faatuatusiina mo “Le teine aulelei ou te vaai i ai i luga o le pasi i aso uma.”

Ua leva ona pasi le Aso o le Valentine, ae na faia lava e Lenny lenei kata faapitoa mo au ma na faatalitali ma le onosai mo se avanoa e tuu mai ai ia te au. Sa le mafai ona taofi le tafe ifo o ou loimata i ou alafau. E ese lou faafetaia o le le tuulafoaiina o au e le Agaga ma ua iu ai ina ou tuuesea lou faamaualuga ma taulimaina ai lou fefe e talanoa atu ia Lenny.

E sau o ia i le taimi lenei e fai aiga afiafi i Aso Sa o vaiaso uma ma ua avea e pei lava o se tasi o lo matou aiga. O aso uma lava e fesoasoani Lenny ia ou manatua faamanuiaga lea e oo mai pe a tatou faagaloina le faamaualuga ma maua le lototele e faia le mea sao. O le vaai atu ia te ia i aso uma e faamanatu maia ia te au le 1 Ioane 4:18: “E leai se fefe i le alofa; a o le alofa atoatoa e faateaeseina ai le fefe.”