O Lo Tatou Tiute Faamatua i le Atua ma i le Tupulaga Faia’e
Ua tuuina mai e le Alii ia i tatou le tiute o le “tausia o a [tatou] fanau i le malamalama ma le upumoni.” Sei o tatou tali atu ma le faatuatua ma le naunautai i lenei valaau e fai lo tatou tiute i le tupulaga faia’e.
O se tasi o tiutetauave aupito taua a se matua o le aoao atu. E pei ona folafola mai i le “O Le Aiga: O Se Folafolaga i le Lalolagi,” “ua i ai i matua se tiute paia … ia aoao [a latou fanau—atalii ma afafine] e alolofa ma feauaunaa’i, ia tausia poloaiga a le Atua, ma avea ma tagatanuu usiusitai i tulafono i soo se mea e nonofo ai.”1
Ou te manatuaina lava se aoaoga mamana mai lo’u tina i Brooklyn, Niu Ioka, ISA, i le 70 tausaga ua mavae. Ina ua uma ona papatisoina au e lo’u tama ma a o lei suia ou lavalava susu na ou papatiso ai, sa faasaofai au e lo’u tina i luga o se nofoa faamoe elea i luma o le faatanoa o le vai papatiso. Sa ma toe faamanatuina le taua o le papatisoina i le pule o le perisitua, le faamoemoega o lau feagaiga o le papatisoga ia ou tauaveina i ou luga le suafa o Iesu Keriso, ma le tulafono o le usiusitai. Ona ia fesili mai lea pe o le a sa’u faalogoga. Ou te manatua na ou fai atu ia te ia, sa ou lagonaina i lou tino atoa se lagona mafanafana ma ou te fia maua lea lagona i aso uma o totoe o lo’u olaga.
Sa tilotilo sao mai lo’u tina ia te au ma aoaoina au e faapea, o se taimi e le o toe mamao o le a tuu mai ai e lo’u tama ona lima i luga o lo’u ulu ma o le a faamauina ai au o se tagata O Le Ekalesia a Iesu Keriso o le Au Paia o Aso e Gata Ai. O le a ia tuuina mai i ou luga le meaalofa o le Agaga Paia, sa fai mai ai o ia, ma afai e tumau ona ou ola agavaa, amio sao, ma faamaoni i poloaiga, o le a faatasi pea le Agaga Paia ia te au ma tuuina mai taiala ma taitaiga i lo’u olaga atoa. E ui ina ua leva tausaga o lenei aafiaga ma lo’u tina, ae e lei galo lava ia te au lena taimi taua o aoaoga.
Pe ua tatou iloa ea i le avea ai o i tatou o ni matua le mana o taimi o aoaoga i olaga o a tatou fanau? Pe ua tatou iloa ea le manaomia vave o lo tatou tiute ia fesoasoani atu ia tatou fanau ia malamalama ma ola i mataupu faavae o le talalelei? O se faavae o le faatuatua ma le molimau o le a fesoasoani ia tatou fanau e le gata e onosaia ai faigata o le olaga ae olioli atoatoa ai i faamanuiaga a le Tama Faalelagi.
Faatulaga Tonu Lou Lava Aiga
O le faamoemoega o le galuega a le Alii o le “ia faataunuu le faaofuina o le tagata i le tino ola pea ma le ola faavavau” (Mose 1:39). E mafai e matua ona fesoasoani ia ausia lenei galuega taua i le aoaoina o a latou fanau i “le mataupu o le salamo, ma le faatuatua ia Keriso, le Atalii o le Atua soifua, ma le papatisoga ma le meaalofa o le Agaga Paia i le faaeeina o lima” (MFF 68:25).
I se faaaliga na ala mai i le Perofeta o Iosefa Samita, na aoaiina ai e le Alii ia Frederick G. Williams (1787–1842), o se tasi o le Au Peresitene Sili, ona o le le aoaoina o lana fanau e pei ona sa tatau ona ia faia ai:
“E te lei aoao lau fanau i le malamalama ma le upumoni, e tusa ma poloaiga; ma o lē amioleaga o loo i ai pea le mana ia te oe, o le mafuaaga foi lea o lou puapuagatia.
“Ou te tuuina atu nei foi ia te oe, le poloaiga—afai e te fia laveaiina ia e faatulaga tonu lou lava aiga, aua o i ai mea e tele e le sa’o i lou aiga” (MFF 93:42–43).
Pe o tatou maua ea le lototele e aoao atu ai le malamalama ma le upumoni i totonu o o tatou aiga? Pe ua tatou oo i ni puapuaga i totonu o o tatou aiga ona o loo tatou lafoaia nei tiute? A tatou mafaufau loloto ma tatalo, o le a tuuina mai ia i tatou le malosi faaleagaga ma le taitaiga e fesoasoani e faatulaga lelei ai o tatou aiga.
O Se Fale o le Aoaoga
Ua faatonuina i tatou i tusitusiga paia ia “faatuina … se fale o le aoaoga” (MFF 88:119). Sei ou fautuaina atu ni nai auala e mafai ai e i tatou o matua ona faataunuu lenei tiute i le Atua ma i a tatou fanau.
Ia taulai atu mafaufau ma loto o le fanau i le Faaola. O le faatuatua ma le molimau e ao lava ona totonugalemu ia Iesu Keriso ma Lana taulaga togiola. E tatau ona tatou faailoa atu ia tatou fanau o tatou lava lagona e uiga i le Faaola ma faasoa atu mau po o aafiaga ua faamalosia ai a tatou molimau ia te Ia. E tatau ona tatou fesoasoani atu ia te i latou ia malamalama i le taua o le Togiola ma le auala e mafai ona avea ai ma se faamanuiaga i aso uma i o latou olaga.
Na iloa e Enosa ia Iesu Keriso ma Lana talalelei ona sa ia “faalogoina soo lava o tautala mai [lona] tama e uiga i le ola faavavau” (Enosa 1:3). O fitafita talavou “na aoaoina e o latou tina, pe afai latou te le masalosalo, e laveaiina i latou e le Atua” (Alema 56:47). E musuia i tatou i upu nei a le au sa Nifae: “Ua matou tautalatala ia Keriso, ua matou olioli ia Keriso, ua matou tala’i atu Keriso, ua matou vavalo atu foi ia Keriso, ua matou tusitusi e tusa ma a matou valoaga, ina ia iloa e a matou fanau le mea latou te faamoemoe ai mo le faamagaloina o a latou agasala” (2 Nifae 25:26; ua faaopoopo le faamamafa).
Taitai ma aoao atu e ala i faataitaiga. I le tele o itu, e leotetele atu a tatou amioga nai lo a tatou upu. Na aoao mai Peresitene Polika Iaga (1801–77): “E tatau ona tatou faia [mo a tatou fanau] se faataitaiga tatou te mananao latou te faataitai ai. Pe o tatou iloaina lenei mea? E masani ona tatou vaai i matua o poloaiina le usiusitai, amio lelei, upu alofa, foliga tausaafia, se leo malie ma se foliga fiafia mai se tamaitiiti po o tamaiti, ae o i latou lava ia e tumu i le ita ma le ote! E matuai le fetaui lava ma lē sao lenei mea!”2 O le a matauina e a tatou fanau nei faiga faalefetaui ia i tatou ma atonu o le a latou tauamiotonuina ai lo latou faia o ia foi ituaiga uiga.
Atonu tatou te fesili ifo ia i tatou lava i fesili e pei o: Pe o vaai a tatou fanau o tatou faataunuuina ma le faamaoni o tatou valaauga o le Ekalesia, o atu e le aunoa i le malumalu pe a mafai ai, ma auauna atu i isi ma le manatu popole ma le agalelei faaKeriso? Pe o ta’u atu e a tatou amioga ia i latou o le ola i le talalelei e le o se avega ae o se fiafiaga? Ia tatou mautinoa o a tatou faataitaiga o le a fesoasoani i a tatou fanau e malamalama ai i le uiga o le fausia o le olaga o se tagata i se faavae o le faatuatua ma le molimau.
Faatulaga ni mamanu amiotonu i le aiga. E tatau ona tatou faaaogaina avanoa uma e valaaulia ai le Agaga o le Alii i totonu o o tatou aiga. O se tasi o auala tatou te faia ai lenei mea o le faia e le aunoa o “mea laiti”—tatalo faaleaiga, suesuega faaleaiga o tusitusiga paia, ma afiafi faaleaiga. A tatou faia nei mea o ni vaega o le mamanu o o tatou olaga, o le a latou faia se eseesega tele i le atiina ae o molimau a a tatou fanau. Ia tatou manatua fetalaiga a le Alii na tuuina mai e ala i le Perofeta o Iosefa Samita: “Aua nei loto vaivai i le faia o mea lelei, aua o loo oulua faataatia le faavae o le galuega tele. O mea iti foi e tutupu mai ai mea tetele” (MFF 64:33).
O le isi mamanu taua e faatulaga i le aiga o le ola i tulaga faatonuina a le Alii e faatatau i le faaaogaina o ala o faasalalauga. Faatasi ai ma le oo mai o faasalalauga i masini tekinolosi ua faateleina ai le maua o tusi ma mea faatufanua, ae ua faateleina foi lo tatou mauaina o mea e matagofie ma aoga. Ia tatou uunaia a tatou fanau e ala i le upu ma faataitaiga ia saili atu i mea e “mama, matagofie, logoleleia ma tauleleia” (Mataupu Faavae o le Faatuatua 1:13).
Ia uunaia tatalo patino ma anoa ma suesuega o tusitusiga paia. O le tele o le tuputupu ae o a tatou fanau i le faatuatua ma le molimau e faalagolago lea i a latou faiga masani patino faalelotu. E mafai ona tatou fesoasoani ia i latou e faatutu ni sini e mafai ona faia ai le tatalo ma le suesueina o tusitusiga paia o ni faiga masani i o latou olaga.
O le a tele atu lo tatou faamanuiaina i le avea o tusitusiga paia ma se vaega o olaga o a tatou fanau pe afai e avea foi tusitusiga paia ma se vaega o o tatou olaga. A o tatou galulue faatasi ma a tatou fanau, e mafai ona tatou ta’ua e le aunoa tusitusiga paia i ni tulaga eseese. O taimi o aoaoga e mafai ona tupu i le toetoe lava o soo se mea pe afai ua tatou saunia e faaaogaina.
Mo se faataitaiga, o le taimi e aai ai, e mafai ai ona maua se avanoa lelei mo matua ma fanau e fefaasoaai ai mafaufauga ma lagona. E mafai ona tatou fesili atu i fanau po o a ni mea na latou aoaoina mai tusitusiga paia. O a ni a latou fesili o i ai e uiga i mea na latou faitauina? O a nisi o fuaitau e sili ona latou fiafia i ai? E mafai ona tatou faasoa atu ia i latou nisi o a tatou fuaitau e sili ona tatou fiafia i ai ma tau atu ia i latou mafuaaga ua taua tele ai na fuaitau ia i tatou. E tatau ona faaaofia i a tatou talanoaga saunoaga a perofeta soifua ma uunaia a tatou fanau e faitau nei upu e pei ona maua i mekasini a le Ekalesia.
Faaaoga meafaigaluega ua tuuina atu e le Ekalesia i matua. Soo se kamuta lelei lava ua ia iloa le aoga o meafaigaluega lelei—e mafai e meafaigaluega ona faafaigofieina le faiga o se galuega e foliga lofituina. Ua tuuina mai e le Ekalesia le tele o meafaigaluega aoga e mafai e matua ona faaaoga e fesoasoani ai i a latou fanau i le fausia o se faavae o le faatuatua ma le molimau.
O se tasi o faataitaiga lata mai o le lomiga fou ua toe faafouina o le Tiute i le Atua mo alii talavou. O le Alualu i Luma o le Tagata Lava Ia lea e lei leva foi ona toe faafou, o se meafaigaluega manaia ma le mamana ua faamoemoeina mo tamaitai talavou.3 O faamanuiaga e maua e o tatou tagata talavou mai le Tiute i le Atua ma le Alualu i Luma o le Tagata Lava Ia, o le a matuai faaleleia lava a o auai ma lagolagoina e matua i latou i a latou taumafaiga.
Mo se faataitaiga, o le faafouga o le Tiute i le Atua ma le Alualu i Luma o le Tagata Lava Ia, e uunaia ai le autalavou ia faasoa atu i tagata o o latou aiga ia sini, aafiaga, ma lagona ua latou maua a o latou faia ia fuafuaga ma galulue i mea o loo latou aoaoina. Matua, o se avanoa faaauro lenei e faia ai ni talanoaga faaletalalelei ma lau fanau e mafai ona faatamaoaigaina ai a outou mafutaga ma i latou. O le nofoaga mo na ituaiga talanoaga e le faapea sei iloga e aloaia; o nisi o avanoa e sili ona lelei mo le faamalolosia o lau fanau e mafai ona tutupu i taimi o “talanoaga e faia faasamasamanoa.”3
Faaavanoa se taimi e faamasani ai i vaega ua faafou o le Tiute i le Atua ma le Alualu i Luma o le Tagata Lava Ia, e lagolago ai ou atalii ma afafine i a latou sini. A o outou galulue soosoo tauau ma ou atalii ma afafine ma faasoa atu ia i latou ou aafiaga, ia fesili atu e le aunoa ia i latou i mea o loo latou aoaoina ma aafiaga. Faamolemole ia faaaoga lelei ia nei meafaigaluega e faamautuina ai faavae o le faatuatua ma le molimau a a outou fanau.
Ou te faamoemoe o le mulimuli ai i nei fautuaga, o le a mafai ai e i tatou o matua o le Ekalesia ona fesoasoani i a tatou fanau e faataatia se faavae o le faatuatua ma le molimau, o le a faapea ona tatalia ai soo se faafitauli o faamalumalu mai. I le faagaosologa, o le a faapea foi ona tatou tuputupu ae ai faaleagaga ma atiina ae ai sootaga o le alofa ma a tatou fanau lea o le a tumau ai e oo i le faavavau. Ua tuuina mai e le Alii ia i tatou le tiute ia “taitaiina a [tatou] fanau i le malamalama ma le upumoni” (MFF 93:40). Talosia ia tatou tali atu i lenei valaau ma le faatuatua ma le naunautai e faataunuu o tatou tiute i le tupulaga faia’e.
Ata na Tusia e John Luke, vagana ua ta’ua
Ata na Tusia e Ruth Schonwald