Nonoa se Faapona ma Pipiimau

Na ou tuputupu ae i se tamai taulaga i Kanata. Ina ua 13 o’u tausaga, na leai ai se galuega a lou tama ma na siitia atu lo matou aiga i Edmonton ina ia faasaoina mai ai. I ni nai masina talu ona matou siitia atu i le aai, sa matautia le misa a lo’u tamā ma lo’u tina, ma iu ai ina faataotolia lo’u tina i le falemai mo le ono masina. Ina ua mavae sina taimi, sa ia toe faatagaina lo’u tama i lo matou aiga. Sa matua lofituina a’u i lenei mea, ma ou liliu atu ai i meainu malolosi ma fualaau faasaina e aveesea ai le ita lea na tuputupu ae pea i totonu ia te au.

O le taimi tonu lava lea, na maua ai au e faifeautalai. A o ou feiloai atu i aiga o le uarota i le lotoifale, sa faagaeetia au i le faaaloalo na faaalia e ulugalii o le tasi i le isi ma le alofa na faaalia e matua i a latou fanau. Sa papatisoina au i le 16 o o’u tausaga.

O lo’u tausaga muamua i le avea ai ma se tasi o le ekalesia na faailoa ai le tatau ona ou onosaia nisi o tiga o loo tuputupu ae. Sa ou tuua le faauoga ma le ituaiga olaga sa avea ma ou ‘alofaga mai sauaga i lo’u aiga. Ae paga lea, sa lei mafai e le matou uarota ona ofoina mai se faamafanafanaga o le faauoga fou e faatumu ai lea avanoa. Sa ou le lagona le taliaina a’u ma na ou sauni e toe foi i lo’u olaga tuai pe ana le luitauina au e se faifeautalai ia ou tumau faamaoni i a’u feagaiga o le papatisoga. Sa ou toe tautino ifo ia te au lava ia e aunoa ma le loto i ai, ae sa ou lagona le pei lava o loo ou taupeupe i se maea lea na mamulu atu ma ou lima.

E lei umi ae valaauina au e avea o se peresitene o le vasega a le Lora. Sa ou lagona le le atoatoa; aua sa i ai isi Lora o la’u uarota sa sili atu le agavaa. Ina ua faalauiloa mai lo’u valaauga fou, sa faaalia e se tasi o tamaitai o le uarota lona le fiafia. “E faapefea ona latou valaauina oe?” na ia fai mai ai. “E seasea e sau i le lotu. O le a le mea e te iloa?”

E sa’o a ia; ou te le iloa se mea e tasi. Sa ou lagona le mautinoa o lo’u valaauga o le a le toe toaaga mai ai le tele o Lora—e aofia ai ma au. O lena tulaga sa ou le gafatiaina. Afai sa i ai se tasi i le faasiusiuga o lana maea, o a’u.

Ina ua ou feiloai i le fautua o la’u vasega, o Marlene Evans, sa ou fai i ai e i ai se mea sese tele na faia e se tasi. Ae peitai, na faamautinoa mai e ia na valaauina au mo se mafuaaga. Na amata ona ma galulue ma le le vaivai, ma na ou alu soo i lona fale e aoao ai ou tiute. Faatasi ai ma lana faamalosiau, na iu lava ina mafai ona ou taitaia se fonotaga e aunoa ma le tetete o ou vae.

I se tasi taimi na aumaia ai e Sister Evans se kata lea e faitauina faapea, “Pe a e oo i le tausiusiuga o le maea, nonoa se faapona ma pipiimau ai.” Fai mai a ia o le maea o se faatusa lea o le ola, ma pe a tatou lē faia ni amioga amiotonu, ua tatou tuuina o tatou ola e mamulu atu ma o tatou lima. O le faapona o se faatusa lea o le filifiliga e pipiimau i le talalelei ma le saogalemu e maua mai ai.

Sa ou manatua lena lesona i le taimi atoa o masina na sosoo ai. Sa ou auai i le aoga maualuga i le taimi atoa ma faaopoopo atu ai ma au vasega sa aveina i luga o le initoneti. Sa ou galue i afiafi ma Aso Toonai. Sa ou totogiina e a’u lava ia o’u pili, tusi, lavalava, ma le potu e nofo ai. Sa tele taimi sa ou lagona ai le pei lava ua ou i ai i le faasiusiuga o le maea. O au ea o se tagata ta’uta’ua, i lo’u faia ai o lea mea na o au lava? E leai, ae sa ou nonoaina le faapona ma pipiimau ai.

O le aso, o au o se tasi na faauu mai i le iunivesite, ma o loo galue nei i le vaega e vaaia manaoga o tagata. Na ou faaipoipo i le malumalu ma e toafa la’u fanau. Ua maea ona latou ulu atu i le malumalu ma ua uma a latou misiona. Ma na ou galue i tofiga faaletaitai i le faalapotopotoga a Tamaitai Talavou. O taimi taitasi ou te faia ai, ou te faaaogaina avanoa uma ou te mafaia e faasoa atu ai le savali a Sister Evans i le autalavou. O lona alofa ma lana savali na suia ai lo’u olaga.

Semanu ou te le maua ni faamanuiaga se tele lea ua ou fiafia ai i le aso pe a na ou le aoao e nonoa se faapona ma pipiimau ai.