Na Tuuina e le Alii o Ia i lo Tatou Ala

O se aso mafanafana, ma la i Shìlín, Taipei, Taiuani, sa ma tietie ma la’u soa, o Sister Verhagen i a ma uila e asiasi atu i se tasi o tagata o le Ekalesia. E pei ona masani ai, sa poloka ma pisi le auala. Sa faatumulia le auala, i taavale, o uila afi, ma uila vilivae o agai i le tele o itu.

Sa ou tietie, e pei ona masani ai, e lata i autafa o le auala ina ia pasi ane ai isi taavale. Sa faafuasei, ona ou lavea ma ato au i lalo. Ina ua ou vaai atu i luga, sa ou vaaia se tamaloa o faafia ona faamalie mai. E foliga mai, sa i ai o ia i totonu o lana taavale na paka i autafa o le auala. Ina ua ia tatalaina lana faitotoa e alu i fafo, ae ou sunu’ia loa. Ou te lei iloa o ia, ma e na te lei iloa mai foi au.

Ina ua ou tilotilo ifo i lalo i lo’u vae taumatau, sa ou iloa ai le tulaga o le aafiaga. Sa i ai i lo’u vae se omo tele lava ma ua fula ma lanumoana. Sa tu se taavale mo faalavelave faafuasei lea na i tua atu, ma siaki au, ma ave sao lava au i le falemai. Sa siakiina lo’u vae ma faia se faata pe le o gau. Sa sau foi i le falemai le tamaloa lea sa aafia e vaai po o ou manuia.

A o ou faatali i taunuuga o le faata, sa ma talanoa ma Sister Verhagen i le tamaloa, o Chung Wei. Sa ia fesili faafia mai ia te au pe o a mai au ma faatoese mai mo le mea na tupu. Sa ou faatoese foi ma fai atu ia te ia ua ou fiafia e na o lo’u vae sa afaina.

Sa ma iloa o Chung Wei o se tasi o tamaiti aoga i le kolisi o loo aoaoina le vaiolini. Ina ua maea ona matou talanoa mo sina taimi, sa ma fai atu, “Ma te le mananao e faamamafa ia te oe, ae pe a e fia faalogo i le ma savali, ma te fiafia lava e faatulaga se taimi mo oe e feiloai ai ma alii faifeautalai.” Sa tu o ia mo sina taimi ona ioe lea. Sa fesuiai a matou faamatalaga ma faatulaga le taimi mo ia e feiloai ai ma alii faifeautalai.

Na maua mai la’u faaata. E laki, e le’i gau lo’u vae. Na o le tiga tele ma foliga mataga.

I le faaiuga o lena vaiaso na ta’u mai e Elder Criddle ia te au na la feiloai ma lana soa ia Chung Wei. Sa sologa lelei ia lesona. I ni nai vaiaso mulimuli ane na ou iloa ai e faalua ona ia auai i le lotu ma ua fuafua e papatiso. Sa ou matua fiafia ma faagaeetia.

I le aso 27 o Aperila, 2002, sa papatiso ai Chung Wei, o se tagata pito i fou o le Uarota a Tien Mu. Sa le mafai ona ou auai atu i lona papatisoga aua sa ou siitia ese, ae sa ou faalogo na manuia le papatisoga.

Mulimuli ane sa ou vaai i le faifeautalai, o Elder Packer, o le sa faatalanoaina Chung Wei mo lona papatisoga. Sa fesili Elder Packer ia te ia pe aisea na ia amata faalogo ai i lesona ma filifili ai e papatiso. Sa ta’u i ai e Chung Wei na ia ofo i ma uiga ma Sister Verhagen na faaalia ia te ia. Talu ai ona sa ma agalelei ae le feita ia te ia ona o le faalavelave, sa ia iloa ai atonu o le Ekalesia moni lea. Mulimuli ane, i le taimi o lesona, sa mafai ona ia lagona le Agaga ma fausia ai lana molimau.

Ou te matua faafetai aua sa saunia Chung Wei. Ou te fiafia sa ia mulimuli i musumusuga a le Agaga, ma papatiso, ma ua na mauaina nei le talalelei a Iesu Keriso.

Ou te lei iloa sa tuuina mai e le Tama Faalelagi Chung Wei i lo’u ala i lena aso. Ou te lei iloa ua saunia o ia e faalogo i le talalelei. Ae ou te iloa e tatau ona avea i tatou ma soo o Keriso i taimi uma ma taumafai e amioa’i e pei o Ia. Ou te iloa e tatau ona tatou faasoa atu le talalelei ia i latou o e o loo tatou feiloai pea i ai aua tatou le iloa lava po o ai ua saunia e le Alii e faalogo i lana talalelei.