Tama, Papatiso Au!

Ou te savali atu i le faitotoa i se tasi o afiafi, o nofo i se nofoa i le umukuka lo’u afafine o Jessie, e ono tausaga. O ona foliga vaaia sa faapopoleina ai au. Sa ou fesili atu ia te ia po o le a le mea ua tupu.

“Tama, e moni o au o se afafine o le tiapolo?” sa ia fesili ai ma le popole tele.

Sa taia a’u i lana fesili e pei o se pakete vai malulu. Fai mai Jessie o le uso o lana uo e tolu masina le matua ua uma ona papatiso. Sa ofo Jessie ma fesili atu i lana uo pe aisea ua papatiso laitiiti ai lona uso. Sa tali mai lana uo o pepe uma lava e tatau ona papatiso.

“E lei papatisoina oe?” o le fesili lea a lana uo. Ina ua tali atu Jessie e leai, sa ta’uina atu e lana uo o ia o se afafine o le tiapolo.

“Tama, papatiso au!” o le augani atu lea a Jessie. “Ou te le fia manao e avea au o se afafine o le tiapolo!”

Sa ou iloaina o lenei luitau e manaomia le foiaina i se taimi vave lava. Sa ou faamalamalamaina le taua o le papatisoga ma le ala e le manaomia ai ona papatisoina tamaiti seia atoa le valu o o latou tausaga (tagai i le Moronae 8:11–23). Ona e na o le ono ona tausaga, sa ou fai atu ai ia Jessie e tatau ona ia faatali teisi lava a o lei papatisoina o ia. Sa ou faamautinoa atu ia te ia o ia o se afafine o le Atua ma e alofa o Ia ia te ia. O lana fesili na tatai atu ai i maua i le Moronae 10:4–5, lea e tau maia ia i tatou e Moronae le ala tatou te filifili ai “le tonu o mea uma lava.”

Ina ua maea le faitauina o nei fuaiupu, sa ou fesili ia te ia pe manao e tatalo atu i le Tama Faalelagi ma fesili ia te Ia pe moni nei mea sa ma talanoa ai. Sa ia tali mai ioe.

Sa ma tootutuli faatasi, ma sa punou le ulu Jessie ma tatalo, “Tama Faalelagi, ou te fia iloa pe moni mea sa ta’u mai e lo’u tama ia te au. I le suafa o Iesu Keriso, amene.”

Sa ou iloa na ou taitaiina atu lo’u afafine e faia se tasi o tatalo e sili ona taua o lona olaga. Sa amata ona ou aioi atu i lo’u loto e pei ou te lei faia muamua lava, ma aioi atu i le Tama Faalelagi e tali mai lana tatalo.

Ina ua maea ni nai minute, sa ia fai mai, “Ou te lei lagona lava se mea.” Sa ou opoina o ia i ou lima ma fai atu, “Na auina mai ia i tatou e le Tama Faalelagi le Agaga, o le na te tali mai ia te i tatou ma le …” Sa tuu lo’u lima i luga o lo’u fatu. Sa ia faalavelave mai ia te au ma fai mai, “Ma se lagona mafanafana i lou fatafata!” Tama, ua ou lagonaina!”

Sa ou opomauina o ia ma faafetai i le Tama Faalelagi mo le taliina o lana tatalo. Sa ou lagona foi le mu o lo’u loto. Sa ou tau atu ia Jessie o le lagona sa ia lagonaina o le tali lea i lana tatalo ma o lea ua ia iloa o ia o se afafine o le Atua ma e tatau ona ia papatiso pe a valu o ia. Sa ia tau mai ia te au o le a ia faatali.

Ua tele tausaga ua mavae talu mai lena aafiaga, ae o loo faamanatu mai pea ia te au e faataunuuina lava e le Tama Faalelagi ana folafolaga.