O Faamanuiaga e Mulimuli Mai i le Usiusitai

Ina ua maea a’u sailiiliga i le Ekalesia mo le lua masina, sa aoaoina au e faifeautalai e uiga i le tulafono o le sefuluai ma valaaulia au e totogi le sefuluai pe a ou auai i le Ekalesia. Na foliga mai e le mafai i le utiuti o lo’u totogi, ae peitai, na faamaeaina le matou talanoaga ae ou te lei ta’u atua ia i laua ou lagona.

Sa faafeiloai au i lena Aso Sa i le lotu, e le peresitene o le paranesi. Sa ou fesili ia te ia e uiga i le sefuluai, ma na ia folafola mai ma te feiloai na o maua pe a maea le sauniga.

Ina ua ma feiloai, na ou faamalamalama atu, “Na ta’u mai e faifeautalai ia te au e tatau ona ou totogia le tasi-vaesefulu o a’u tupe maua i le Ekalesia pe a avea au ma se tasi o le ekalesia. Ou te le iloa pe mafai ona ou faia.”

Ina ua maea ona faafofoga mai i lo’u atugaluga, sa susue e le peresitene le Tusi a Mamona, i le 3 Nifae 24:10, ma faitau, “Ina aumai ia mea e sefuluai a outou mea uma lava i le fale e teu ai mea … ma ia outou tofotofo mai ai ia te au, ua fetalai mai ai le Atua o au, pe ou te le toina pupuni o le lagi mo outou, ma sasaa atu le manuia mo outou ina seia silisili ona tele.” Ona ia faapea mai ai lea, “Brother Ko, tagai ma le faaeteete i le mea o loo fetalai mai ai le Alii, ‘Tofotofo mai ai ia te au.’ O Lana valaaulia lena mo oe. Aisea e te le tofotofoina ai o Ia i le totogiina o le sefuluai o se mea muamua lava i le masina e sosoo ai ma vaai pe Na te le faamanuiaina oe.”

E le’i leva ae amata la’u suesuega i le sefuluai ma auai i le Ekalesia. Talu mai lena taimi ua ou atiina ae se auala fou i le puleaina o tupe. O le mea sili lava, ua ou aoaoina mo au lava ia le sasaaina mai e le Atua o se faamanuiaga, ma ua silisili ona tele. Na ou aoao e tatau ona tatou tausia poloaiga a le Atua ae tatou te lei faatali mo Ana faamanuiaga.