Tuua le Pati!

O ni nai tausaga ua mavae atu sa ou maua ai le avanoa e fai ma sui o le setete o Iuta i se fonotaga faavaomalo i Ohaio lea na auai tagata aau mai aoga maualuluga.

O lo matou nonofo ai iina sa aofia ai ni pati mo le au taaalo. Ina ua ou alu i le pati i le po muamua, sa ou manatu o le a pei o pati manaia lea sa faia i tua o le matou nuu—inuina o root beer (apa inu) ma faia ni taaloga. Ae i le taimi lava sa ou savali atu ai i totonu o le potu, sa ou iloa tonu lava le ituaiga pati.

Na vave lava, ona ou malamalama i mea na talanoa mai ai tusiga i mekasini o le Ekalesia pe a latou fai mai, “E iloa gofie lava oe pe a na o oe lava le tagata o le Ekalesia.” Ae i se isi itu, na iloa lelei e a’u uo taaalo o a’u o se tasi o le Au Paia o Aso e Gata Ai. Sa filemu mea uma i totonu o le potu, ma na foliga mai sa tilotilo uma mai tagata ia te au a o ou tago atu i le pesini chip.

“Ei,” o le tala lea a se tasi, “o oe o se Mamona, a ea?”

Sa ou ataata ma lo’u agaga fiafia ma fai atu, “Ou te mautinoa lava, ma e ou te fiafia i le avea ai o au.”

Ona toe faaauau lea o le pati, ae na ou lagona lava le toatele o e na tilotilo mai ia te au, ma matauina au taga uma. E lei umi lava, ae amata loa ona le taofiofia le pati. Sa ou le iloa pe o le a le ituaiga tulaga o le a oo i ai, ae sa ou le manao e avea ma se vaega o lena pati. Pe a ou nofo, sa ou fefe o le a ou faailoa atu i tagata se uiga sese o ou tulaga faatonuina. E le gata i lena, sa musuia au e le Agaga ou te alu ese. Ina ua ou tago i la’u ato taele ma agai atu i le faitotoa, sa valaau mai se tasi o alii, “Ei, e te fefe ia i matou?”

Sa na o lo’u ataata ma faapea atu, “Tatou feiloai taeao.” O lea sa ou savali ese ai i fafo, ma se lagona lelei sa ou faailoa atu lo’u tagata a o puipuia tulaga faatonuina a le Alii.

I le aso na sosoo ai a o faia se fonotaga a faauluuluga o matagaluega, sa tulai se tasi o sui ma saunoa mai i lona leo saua, “Sa i ai le mea na tulai mai anapo ma ou te le manao lava e toe tulai mai. Ua outou i ai iinei e avea ma sui o le setete, ia faia ma le tatau ma amio e tusa ai!”

Ona ia faaopoopo mai lea, “O nisi o outou na tuua le pati ma sa lei aafia i le mea na tulai mai. Faafetai lava.”

Mo lena vaiaso atoa, sa faaaloalogia tele au ma faaalia mai le tele o uiga faaleuo ou te lei mauaina muamua. O le toatele o faiaoga mai le Iunaite Setete na uunaia au ou te momoe mo le avanoa e fai ma sui o le au taaalo mo setete i sisifo ona sa lelei lo’u avea ma sui o Iuta.

Ou te lei iloa lava le mea na tupu i le pati, ae ou te faafetai na musuia au e le Agaga ou te aluese mai le pati.