O Se Opo mo Jennifer

Na tapuni e Jennifer le faitotoa o lona potu moe ma oso faapau i luga o le moega. Na soloiese e ia loimata vevela, ma le susu mai ona alafau ma taumafai e faaitiitia lona masusu.

Faatoa uma lava ona latou finau ma lona tuagane ma lona uso matua. Ua o Tama ma Tina i le faleoloa, ma e foliga mai e le toe o mai i le fale.

Sa le lelei le lagona o Jennifer. I lona taumafai malosi e taofi le tetete o ona laugutu, sa ia lagona lava le matua le fiafia. “A na i ai Tina ma Tama i le fale, semanu e foliga lelei mea uma,” o ona mafaufauga ia.

Ona manatua lea e Jennifer o se mea sa ia aoaoina i le Peraimeri e uiga i le tatalo. “E mafai ona e tatalo i soo se taimi,” o le tala lea a lona faiaoga o le Peraimeri. “E mafai ona e tatalo pe a e lagona le fiafia ma pe a e lagona le faanoanoa.”

Na tootuli Jennifer i autafa o lona moega. Na ia togiina le palanikeke i luga o lona ulu e aua ai nei faalavelave ia te ia pe a tatala e se tagata le faitotoa. Na ia toe soloina matu ona loimata, piilima ona lima, ma amata ona tatalo.

“Tama Faalelagi,” o lana tala lea, “faamolemole faamagalo mai au i lo matou taua’imisa ma lo’u tuagane ma lo’u uso i lenei aso. Ma faamolemole fesoasoani mai ia te au ia ou maua se lagona lelei. I le suafa o Iesu Keriso, amene.”

O lea na le toe fia tagi ai Jennifer. Sa faifai malie ona suia le lagona tiga i totonu i se lagona mafanafana, ma le toafilemu. Na lelei ma alofagia ona lagona e pei o opoina o ia e se tagata.

Ina ua taunuu i le fale ona matua i se taimi mulimuli ane, ua uma ona faatoese Jennifer ma ua toe taaalo faatasi ma lona tuagane ma lona uso. A o savali atu Tina i le faitotoa, na tamoe atu Jennifer ma tuu atu ia te ia se opo faatalofa. O le opo a Tina na matagofie se lagona, ae na aoaoina e Jennifer e tusa lava pe leai Tina i le fale, e mafai lava ona ia lagona le mafanafana o le alofa o le Tama Faalelagi.