“E faapefea ona ou tali atu pe afai e tauemuina a’u ona o a’u o se tagata o le Ekalesia faapea foi ma lo’u taumafai e tausisia o’u tulaga faatonuina?”

I se taimi ua tuanai atu sa ou auai ai i se au pasiketipolo lea na masani lava ona taaalo i taaloga i Aso Toonai. Peitai, pe a matou taaalo i le Aso Sa, ou te le auai, ma e ula mai le matou au taaalo ia te au. Ina ua latou fesiligia au pe aisea na ou le taalo ai i le Aso Sa, na ou tali, “O au o se tagata o Le Ekalesia a Iesu Keriso o le Au Paia o Aso e Gata Ai, ma ua aoaoina au e faamamalu le Sapati ae aua le taalo i ni taaloga. Sa ou mulimuli i mataupu faavae o le talalelei aua sa ou iloa e finagalo le Atua mo le mea sili mo i tatou.” Ina ua maea lena, sa faaaloalo la matou au taalo i o’u talitonuga ma ua le toe ula mai ia te au.

E mafai ona faavaivai loto pe a ula isi i ou talitonuga. Ae peitai, ou te taumafai e manatua o i latou o e faifai mai o loo latou misia faamanuiaga o le talalelei. O lea ou te tatalo ai i le Tama Faalelagi ia suia o latou loto ma fesoasoani ia i latou ia malamalama i le taua o le talalelei. Ou te iloa afai ou te ola i se olaga lelei, e tumu i faataitaiga, o le a mafai ona fesoasoani au faataitaiga ia i latou e suia ai.

Afai e faifai atu se tasi ia te oe ona o oe o se tagata o le Ekalesia, na o le ta’u lava i ai e i ai lau molimau o le Ekalesia ma e te fiafia e alu i le lotu. Tau atu ia i latou e te lagona le latalata mai o lou Tama Faalelagi. Aua le ma pe fefe e ta’u atu le mea sao!

Sa ou faitau i le tusiga a Elder D. Hales e uiga i le lototoa FaaKerisiano ma le ala e tatau ona tatou tali atu ai ma le alofa ae le o le ita ia i latou o e faasagatau mai le Ekalesia.¹ Afai tatou te faaali atu lo tatou manatu popole, ona taofia lea o uiga le lelei o le toatele o tagata o loo faaali mai ia i tatou. E tatau lava ona e taulimaina pea tagata ma le faaaloalo ma le alofa aua o le a toe oo mai lava ia te oe. A fai atu tagata e te faia se mea e le fetaui ma ou tulaga faatonuina, ia teena lemu ma fai i ai, “O au o se tagata o le Ekalesia a le AAG ma e ou te le talitonu e lelei lena mea e fai.” Atonu e mafai foi ona e fautua atu se gaoioiga fou e le tetee i ou tulaga faatonuina.

E muamua lava, ona ou mafaufau i le faataitaiga a le Alii. Ina ua Ia tuuina mai Lona soifua mo au, e lei i ai Sona pona po o soo se mafuaaga e tatau ai ona Ia puapuagatia. Lona lua, ou te mafaufau i le faataitaiga a Iosefa Samita, o le sa silafia le ala ina ia malosi ma lototoa ai ina ia oo mai i le aso ou te mitamita ai i lo’u auai i Le Ekalesia a Iesu Keriso o le Au Paia o Aso e Gata Ai. Lona tolu, ou te faaauau pea le tumau ai i au mataupu faavae e ala i le agalelei atu ma le auauna atu. Ou te faaalia lo’u alofa mo i latou i le avea ai o se uo mamae ma se faataitaiga e mafai ona latou maua. Ou te faaalia ia i latou ia faamanuiaga e oo mai ia i latou i le usiusitai i mataupu faavae o le talalelei. E ui lava i lea, o i tatou uma lava o fanau a le Tama alofa mutimutivale ma pele e toatasi.

E tatau ona tatou manatua pe aisea ma pe o ai foi tatou te ola ai i o tatou tulaga faatonuina. Afai tatou tausia pea i o tatou mafaufau le faataitaiga a le Faaola, o le a tatou saunia e tumau i ia tulaga ma le lotomaualalo, e aunoa ma se agaga o le fefinauaiga, ma e aunoa ma se lagona o le matamuli mo tulaga faatonuina ua tatou filifilia e ola ai. A o tatou faia ai i lenei auala, ua tatou faapupulaina atu lo tatou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi (tagai i le Mataio 5:16).

I le iunivesite lea sa ou a’oga ai, sa i ai se alii talavou sa faatiga ia te au ona o au o se tagata o le Ekalesia. Sa ia manao pea lava pea e finau, o lea sa na o lo’u taumafai lava e aloese mai ia te ia. Ona ou tuuina atu lea o la’u molimau ia te ia i se tasi aso, ma na taofia ai lona faatiga ia te au. E tatau lava pea ona tatou tumau mausali ma manatua pe na faapefea ona maua a tatou molimau. E tatau ona tatou tali atu ma le pulea lelei o i tatou lava ina ia i ai pea e le aunoa le Agaga Paia e faatasi ma i tatou ma faamalolosia i tatou, e tusa lava pe o a faamatalaga po o manatu e fai mai e isi. E tatau ona tatou tatalo mo na tagata ina ia latou taliaina Iesu Keriso i se aso.

Sa ou iloaina o le faitauina o lo’u faamanuiaga faapeteriaka na matuai fesoasoani lava. Na aumaia ai ia te au se malamalama sili po o ai au, o o’u vaivaiga, ma o’u malosiaga ina ia mafai ona ou taulimaina lelei ia tofotofoga e pei ona i ai nei. E na o le lua lava au uo AAG ou te latalata i ai, ae ou te talanoa soo ia i laua i ala e foia ai tofotofoga. Ou te manatu o le a matuai fesoasoani lena mea ia te oe. O le isi auala lelei tatou te taulimaina ai lenei faafitauli o le faaali atu lea o le agalelei ma avea o se faataitaiga i mea uma e te faia. E matua mautinoa lava lou le mafai ona faamalosia tagata e sui o latou mafaufau, ae o le agalelei atu ma ia faatelegese le ita atonu o se auala sili lea e faaali atu ai le taua o le Ekalesia ia te oe.