Mauaina o i Tatou Lava i le Miti a Liae

I le 1 Nifae 8, faitau e uiga i le miti a Liae. Na ia ta’u atu i lona aiga, “Faauta, ua ou faia le miti; o lona uiga, ua ou iloa le faaaliga” (1 Nifae 8:2).

Atonu e te manatu o le miti a Liae po o le faaaliga e leai sona uiga faapitoa mo oe, ae e i ai. O loo e i ai i totonu; o loo tatou i ai uma lava i totonu.

Na saunoa mai Nifae, “[E faatatau tusi paia uma] ia te i matou, ina ia aoga e aoaoina ai i matou” (1 Nephi 19:23).

O le miti a Liae po o le faaaliga i le ai uamea o loo i ai mea uma lava e manaomia e se Au Paia o Aso e Gata Ai e malamalama ai i le tofotofoga o le olaga.

Na vaai Liae:

• O se fale tele ma le vateatea (tagai i le 1 Nifae 11:35–36; 12:18).

• O se ala o mulimuli atu i se vaitafe (tagai i le 1 Nifae 8:20–22).

• O se puao o le pogisa (tagai i le 1 Nifae 12:17).

• O le ai uamea ua taitai atu i le puao pogisa (tagai i le 1 Nifae 11:24–25).

• O le laau o le ola, “ua manaomia ona fua e faafiafia ai le tagata” (1 Nifae 8:10; tagai foi i le 1 Nifae 11:8–9, 21–24).

Faitau ma le faaeteete i le miti po o le faaaliga; ona toe faitau lea.

Afai e te pipiimau i le ai uamea, e mafai ona tautagotago i luma lou ala faatasi ma le meaalofa o le Agaga Paia, lea na faaeeina atu ia te oe i le taimi na faamauina ai oe o se tagata o le Ekalesia. O le a faamafanafana oe e le Agaga Paia. O le a mafai ona e lagonaina le uunaiga a agelu, e pei o Nifae, ma tautagotago lou ala i le olaga.

Ua avea le Tusi a Mamona ma au ai uamea.

Na vaai Liae i le motu o tagata e le masino “ua fetaomi mai i luma” i le laau (1 Nifae 8:21).

O le fale tele ma le vateatea “ua tumu foi i tagata, o e matutua ma e iti, o tane atoa ma fafine; sa matua lelei le uiga o latou ofu; ua faasaga i latou i le tauemu ma ua tusi mai o latou tamatamai lima i e na o mai ma ua aai i le fua” (1 Nifae 8:27).

E tasi le upu i lenei miti po o le faaaliga e tatau ona i ai se uiga faapitoa i le autalavou o le Au Paia o Aso e Gata Ai. O le upu o le uma. O le uma ona maua e tagata le laau ua latou maasiasi, ma ona o le tauemu o le lalolagi ua latou pauu ese ai.

“Ina ua uma ona latou aai i le fua ua maasiasi i latou, ona o e ua tauemu ia te i latou; ma ua latou pauu ese i ala leaga ma ua le iloa. …

“Ma ua toatele le motu o tagata ua ulufale i lena fale e uiga ese. Ma ua uma ona latou ulufale i lea fale ona latou tusi lea le tamatamai lima o le tauemuga ia te au ma e o aai i le fua o le laau.” O le tofotofoga lena; ona fai mai lea o Liae, “A ua matou le amanaia i latou” (1 Nifae 8:28, 33; faaopoopo le faamamafa). Ma o le tali lena.

Na tusia e Nifae le atalii o Liae:

“O au foi o Nifae, ua manao foi ina ia ou vaai, ma faalogo, ma iloa nei mea, i le mana o le Agaga Paia, o le mea foaifuaina lea a le Atua ia i latou uma o e sailiili ia te ia ma le filiga. …

“Aua o le saili ma le filiga e iloa e ia; e faamatalaina mea lilo a le Atua ia te i latou, i le mana o le Agaga Paia, e tusa ma aso nei ma aso anamua, e tusa foi i aso anamua ma aso o lumanai; o lea e leai ai sina liliu itiiti e faavavau i le ala o le Atua” (1 Nifae 10:17, 19).

O faailoga uma i le miti a Liae na faamalamalama i lona atalii o Nifae, ma na tusia ai e Nifae.

I lo outou papatisoga ma le faamauga, na outou pipiimau ai i le ai uamea. Ae e te le saogalemu lava. O le uma ona e ’ai i lena fua o le a oo mai ai lou tofotofoga.

Ou te mafaufau soo lava i se tasi o au uo i le vasega—e matua atamai lava, aulelei, faamaoni i le Ekalesia, ma faatumulia i taleni ma tomai. Na ia faaipoipo lelei ma na vave ona lauiloa. Na amata ona ia fetuunai e faamalie le lalolagi ma ē o loo siomia ai o ia. Na latou faavaleaina o ia e mulimuli atu i o latou ala, o ala ia o le lalolagi.

O nisi taimi o se mea e matua faigofie lava le auala e fai ai au teuga po o ou lavalava, e pei o se tamaitai talavou o loo faaveuveua lona lauulu i taimi uma ina ia foliga mai e lei selua po o se alii talavou o loo ofu i ni ofu tetelē, i le manao i tifiga.

I se vaega o nei mea laiti, ua tau matagataga ai le piimau a la’u uo i le ai uamea. Sa pipiimau lona toalua i le ai uamea i le lima e tasi a o le isi lima ia te ia. Na iu lava, ina mamulu ese atu o ia mai lona toalua ma faamamulu ai le ai uamea. E pei lava ona valoia mai i le miti po o le faaaliga a Liae, na ia pau ese atu i ala faasaina ma ua leiloa.

E matele lava ona o televise, ua tatou nonofo ai i totonu o lena fale tele ma le vateatea, ae ua le na ona vaavaai atu i ai. O lou taunuuga lena i lenei augatupulaga. O loo e nofo i totonu o lena fale tele ma le vateatea.

O ai na tusia lenei faaaliga ofoofogia? E leai lava se mea faapena i totonu o le Tusi Paia. Pe na fatuina ea e Iosefa Samita? Pe na ia tusia ea le Tusi a Mamona? E sili atu la le faigata ona talitonu i ai nai lo le tala i agelu ma papatusi auro. Sa na o le 24 tausaga o Iosefa Samita i le taimi na lolomiina ai le Tusi a Mamona.

O le a e saogalemu pe a e foliga ma teu ma amio e pei lava o se tagata masani o le Au Paia o Aso e Gata Ai: fai ofu e talafeagai, auai i au fonotaga po o sauniga, totogi le sefuluai, ‘ai ma inu i le faamanatuga, faaaloalo i le perisitua, ava i ou matua, mulimuli i ou taitai, faitau tusitusiga paia, suesue i le Tusi a Mamona, ma tatalo—tatalo e le aunoa. O le a uuina lou lima e se mana lē vaaia a o e pipiimau i le ai uamea.

Pe o le a foia ea e lenei mea ou faafitauli uma? E leai lava! O lena mea o le a le talafeagai ma le faamoemoega o lou sau i le olaga nei. Ae peitai, o le a tuuina atu ia te oe se faavae mausali e fausia ai lou olaga (tagai i le Helamana 5:12).

O le a matua ufitia oe i ni isi o taimi e le puao pogisa o le a le mafai ai ona e iloa atu lou auala e oo lava i sina va puupuu o i luma atu. O le a le mafai ona manino lau vaai. Ae peitai o le meaalofa o le Agaga Paia, ua mafai ai ona e tautagotago lou ala i luma i le olaga. Uumau le ai uamea, ma aua le faamamuluina. (Tagai i le 3 Nifae 18:25; MFF 9:8.)

O loo tatou ola i se taimi o le taua, lena taua faaleagaga o le a le muta lava. Na lapataia i tatou e Moronae i taupulepulega faalilolilo lea na amataina e Katianetona “ua i ai i nuu uma lava. …

“O le mea lea, Outou Nuu ese e, [ma o le upu Nuu ese i lena vaega o le Tusi a Mamona e faatatau ia i tatou i la tatou augatupulaga], o le poto o le Atua e faailoaina atu ai nei mea ia te outou, ina ia outou salamo ia outou agasala, ae le tuuina atu ia manumalo ia te outou o nei pulega fasioti tagata. …

“O le mea lea ua poloai mai ai le Atua ia te outou, pe a outou iloa ua oo mai nei mea ia te outou, tou te ala mai ma mafaufau i le mea faigata ua oo ia te outou, ona o lenei pulega faalilo e i ai ia te outou” (Eteru 8:20, 23–24).

O le au le talitonu ma masalosalo pe i ai se Atua ua fai ma a latou lotu le le talitonu ma ua faatulagaina i le asō i ni auala tulaga ese e osofaia ai le faatuatua ma le talitonuga. Ua faatulagaina nei i latou, ma ua latou tulimatai atu i malosiaga faaupufai. O le a outou faalogo soo e uiga ia i latou ma mai ia i latou. O le tele lava o a latou osofaiga e le tuusao i le tauemuina o le faatuatua, ma le lotu.

O loo nonofo faatasi ma i tatou ni ituaiga o Serema, Neoa, ma Korioa (tagai i le Iakopo 7:1–21; Alema 1:1–15; 30:6–60). E le tele se eseesega o a latou finauga ma e o i le Tusi a Mamona.

O outou o e o talavou o le a vaai i le tele o mea o le a tofotofoina ai lo outou lototoa ma suesue ai lo outou faatuatua. E le o tauemuga uma lava e sau mai fafo atu o le Ekalesia. Sei ou toe fai atu lena mea: e le o tauemuga uma lava e sau mai fafo atu o le Ekalesia. Ia faaeteete ina ia outou lē pauu atu i totonu o le vaega lena o le tauemuga.

Ua folafola mai le Alii, “Afai ua saunia outou o le a outou le matatau ai lava” (MFF 38:30).

Na oo lava ia Moronae na feagai ma lena luitau e tasi. Na ia saunoa mai, ona o lona vaivai i le tusitusi:

“Ou te fefe … nei tauemu mai Nuu Ese ia matou upu.

“[Ma na fetalai mai le Alii ia te ia:] E tauemu o e valelea, ae peitai, e faanoanoa i latou; a ua lava lou alofa tunoa i e agamalu, latou te le tauemu ai ona o lo outou vaivai;

“Afai e o mai tagata ia te au, ou te faailoa atu ia te i latou lo latou vaivai. Ou te tuuina atu i tagata le vaivai, ina ia latou faamaulalo ai; ma ua lava lo’u alofa tunoa i tagata uma o e faamaulaloina i latou lava i o’u luma; aua afai latou te faamaulaloina i latou lava i o’u luma, ma faatuatua ia te au, ona ou faia lea o mea vaivai ma mea malolosi ia te i latou” (Eteru 12:25–27).

Na teuina i totonu o lena miti po o le faaaliga le “penina tautele” (Mataio 13:46).

Na vaaia e Liae ma Nifae:

• O se taupou o sapasapaia le tamameamea i ona lima (tagai i le 1 Nifae 11:15–20).

• O lē o le a teuteuina le ala—Ioane le Papatiso (tagai i le 1 Nifae 11:27).

• O le auaunaga a le Alo o le Atua (tagai i le 1 Nifae 11:28).

• E toasefululua ni isi o mulimuli i le Mesia (tagai i le 1 Nifae 11:29).

• Ua avanoa le lagi ma ua auauna atu agelu i le fanauga a tagata (tagai i le 1 Nifae 11:30).

• Ua faamanuiaina ma faamaloloina le motu o tagata (tagai i le 1 Nifae 11:31).

• O Le Faasatauroga o le Keriso (tagai i le 1 Nifae 11:32–33).

• E faasagatau atu i Lana galuega le poto ma le faamaualuga o le lalolagi (tagai i le 1 Nifae 11:34–36; tagai foi i le 1 Nifae 1:9–14).

O nei mea uma na la vaaia i le miti po o le faaaliga. Ma o le mea lena o loo tatou feagai i le taimi nei.

O lenei la ia te oe, le toatasi o le lua miliona, ou te tautala atu faapitoa ia te oe. E pei ona faia e perofeta ma aposetolo anamua, “ua matou tautalatala ia Keriso, ua matou olioli ia Keriso, ua matou talai atu Keriso, ua matou vavalo atu ia Keriso, … ina ia iloa e a matou fanau le mea latou te faamoemoe ai mo le faamagaloina o a latou agasala” (2 Nifae 25:26).

“E tautala mai agelu i le mana o le Agaga Paia; o le mea lea, ua latou fetalai mai ai le afioga a Keriso. O le mea lea, na ou fai atu ai ia te outou, ia outou fiafia i le afioga a Keriso; aua faauta, e faaalia mai ia te outou i le afioga a Keriso mea uma tou te faia” (2 Nifae 32:3).

Ona faaopoopo mai lea o Nifae:

“O lenei foi, ina ua uma ona ou fai atu nei upu, afai e le malamalama ai ia te outou, e le mafai ona ua outou le ole atu, pe tuitui atu outou; o le mea lea, ua le aumaia ai outou i le malamalama, ae fano outou i le pouliuli.

“Aua faauta, ou te toe fai atu ia te outou, afai tou te ui atu i le ala ma talia le Agaga Paia, na te faaali ia te outou mea uma e tatau ona outou faia” (2 Nifae 32:4–5).

O loo outou ola i se augatupulaga mataina, lea o le a i ai pea tofotofoga i o outou olaga. Aoao e mulimuli i musumusuga a le Agaga Paia. O le a avea ma se talita ma se puipuiga ma se faiaoga mo oe. Aua lava nei e maasiasi pe matamuli e uiga i mataupu faavae o le talalelei po o tulaga faatonuina o loo tatou aoao atu i le Ekalesia. E avea pea oe, pe afai e te faamaoni i le Ekalesia, ma se tagata e tulaga ese mai le lalolagi atoa.

Ua ia te oe se faamanuiaga o le faamautinoaga e mafai ona musuia ai oe i au faaiuga uma. E tele au faaiuga o loo i luma atu—faaiuga e fatatau i le faaumaina o le a’oga, sailiga o se soa o le olaga, sailiga o se galuega, faamautu o se aiga, tausia o ni fanau i se lalolagi ua feliuai i luga ma lalo. O le a faaalia i lau fanau le tele o mea nai lo le tatou augatupulaga.

Ua matou matauina, a o matou femalagaai solo i le Ekalesia, ua sili atu le malolosi o o tatou tagata talavou na i lo na taimi muamua. Pe a ou faalogo a o latou lauga i konafesi ma sauniga faamanatuga, ou te faalogo atu o latou sii maia mau, ma ou te faalogo foi o latou puipuia tulaga faatonuina. Ou te le faalogoina le tauemuga faauigalua lena e masani ai i latou e le faatuatua ma e lei liua moni lava.

Ua matou pulefaamalumalu i se ekalesia e 13 miliona-ma sili atu o tagata o le ekalesia ma o loo tuputupu ae pea. Ua i fafo atu i le lalolagi le Ekalesia. O le tele lava i le taimi nei ua faavaomalo. O le toatele o tagata o le Ekalesia e le maua se avanoa e o ai i kolisi, ae o loo latou ola ai i le talalelei. Ma o se mea matagofie, ma le mamana le vaavaai atu ma faatasi ai ma i latou.

Pe a matou mafaufau ia te outou le autalavou o le Au Paia o Aso e Gata Ai ma mafaufau i le Tusi a Mamona ma mafaufau i le miti po o le faaaliga lea na maua e Liae, ua matou vaai e i ai valoaga o i ai iina e mafai ona faatatau faapitoa i o outou olaga. Toe faitau i ai, amata i le 1 Nifae 8, ma faitau e oo i le fautuaga o loo tuuina mai. O loo talanoa mai le Tusi a Mamona i le olaga pe a mavae le oti: po o le a le mea e tupu i le agaga (tagai i le Alema 40:11–12) ma e po o le a le mea o tupu i le lalolagi o agaga (tagai i le 2 Nifae 2:29; 9:10–13). O mea uma lava e manaomia ona outou iloa, o loo i ai iina. Faitau i ai, ma faia ia avea o se vaega o lou olaga. Ona avea lea o faitioga ma tauemuga a le lalolagi, tauemuga ia i latou o i totonu o le Ekalesia, ma mea tou te le ano i ai e pei foi ona matou le ano i ai (tagai i le 1 Nifae 8:33). Na ona tatou agai lava i luma ma faia mea ua valaaulia i tatou e fai ma ia iloa o loo taitaia i tatou e le Alii.

Ou te tatalo ia i ai faamanuiaga a le Alii i o outou luga ma a outou galuega. Ou te tatalo ia i ai faamanuiaga a le Alii i luga o o outou olaga a o outou agai atu i luma mai le taeao o o outou olaga, i nofoaga o outou i ai nei, e oo atu i le tuneva o le afiafi o o outou olaga, i le mea o o’u i ai nei, ina ia outou iloa e moni le talalelei a Iesu Keriso. O le a outou feagai ma le tele o mea maoae ma le gaogaosa ma faigata i o outou olaga, ma o le a outou fiafia i musumusuga ma le olioli maoae i o outou olaga.

Ua sili atu outou nai lo le mea na matou i ai. Ua i ai lo’u talitonuga maumaututu e ui lava i mea e mautinoa le oo mai ma valoaga na tuuina mai, na faapolopolo e le Alii agaga faapitoa e aumai i le taimi lenei ina ia vaai o malupuipuia ma agai i luma i le lalolagi Lana Ekalesia ma Lona malo. I le avea ai ma se auauna a le Alii, ou te tatalo mo Ana faamanuiaga ia i ai i o outou luga ma molimau atu ia te outou e moni le talalelei.