Vaega o se Mea Uiga Ese

I le faaiuga o le tautotogo o le 1967, sa talosagaina le matou uarota e filifili ni talavou se 16 e sisiva i le Faaaliga Siva Faale-Ekalesia. Mo si o matou tamai aai i nofoaga i tua i Idaho, o se mea uiga ese lea. O le a faia le faafiafiaga i le malae taalo tele o le Iunivesite o Iuta ma e faitau afe o le a auai. E le o au o se tagata siva ma sa ou le fia auai i le faataitaiga muamua, ae sa vave ona ou fiafia i le i ai faatasi ma alii ma tamaitai lelei sa sauniuni mo le faafiafiaga. O le mafaufau i le malaga atu i le aai tele o Sate Leki ma nonofo i le faletalimalo ma se vai taele na faaosofia ai i matou.

Sa matou taunuu i le Aai o Sate Leki i le aso na atofaina ma amata loa ona faia o matou lavalava mo la matou faafiafiaga. Sa faafuasei lava ona ou iloa e lei i ai lo’u ofuvae lanu uliuli lea e tatau ona ou ofuina mo le matou siva. Sa galo i le fale. E lei taitai lava i ai so matou manatu e o i le faleoloa e faatau se ofuvae, ona o le a matua taugata. Sa ou le iloa le mea e tatau ona ou faia.

Na foia lea tulaga ina ua ofo mai e Brother Lowe, o lo’u taitai o Alii Talavou, lona ofuvae paauli ou te ofuina. Ina ua ou faamauluina le ofuvae, na ou fiafia lava ona sa tutusa lelei le umi. Ae peitai, na ou vave iloaina e i ai le faafitauli: sa fai sina tele teisi o le puimanava o le ofuvae. “O le a la’u mea o le a fai?” Sa ou mafaufau ifo ai. Sa ou faafetai mo le agalelei o Brother Lowe ae sa ou lagona le matamuli e ofu le ofuvae tele. Sa faamautinoa mai e Brother Lowe ma au uo e leai a se isi o le a iloa aua o le a tele ina ufiufi le ofuvae e lo’u peleue ma e mafai ona ou faaaogaina se fusipau e faamau ai.

Ou te manatua pea le lagona i le taunuu atu i le fale matamata ma vaaia le faitau selau o alii ma tamaitai talavou mai le lalolagi atoa o e na tutusa o matou taofi ma talitonuga maumaututu. Sa avea o se taimi maoae mo au e iloa ai le taua o le Ekalesia i le toatele.

Ina ua oo i lo matou taimi, sa matou o atu loa i le malae. A o amata le siva, i lo’u fefe tele, sa ou lagonaina le tau pau i lalo o le ofuvae lapoa. Sa leai se taimi e foia ai lea tulaga; ua amata le musika. O lea faafitauli na faaopoopo ai ni nai sitepu fou i la’u siva. E le gata i le tatau ai ona manatua mea uma sa aoaoina ai i matou, ae na tatau ai foi ina ou faia ni nai taga fou e taofi ai i luga lo’u ofuvae. O nisi taimi o ia taga sa atuatuvale ai la’u paga talenia, ae na latou faasaoina mai au mai se taunuuga sili atu ona faaletonu.

E le galo lava ia te au si o’u taimi puupuu o le popole i le siva. O le mea e sili ai, o le le mafai ona galo ia te au le lagona o i tatou uma o se vaega o se mea uiga ese—e le na o se faafiafiaga i mea tau siva—ae o le Ekalesia toefuataiina ma le talalelei a Iesu Keriso.