O I Latou O E Ese Mai

E toatele isi tagata e pei o Gary i lo tatou lalolagi. E oo lava i totonu o le Ekalesia o loo i ai ni tuagane ma ni uso faapitoa o e atonu e taua “e ese lava” ma o e o loo matua manaomia lava lo tatou alolofa ma le malamalama. O lo latou manaomia o le alofa ma le malamalama e tupu mai i se aganuu lea o loo atiina ae a o tatou taumafai e ola ai e tusa ma le fuafuaga a le Alii mo i tatou. E pei o isi aganuu uma, e tulai mai le aganuu mai a tatou taumafaiga ina ia ola ai e tusa ma le talalelei a Iesu Keriso e aofia ai ma ni faamoemoega mautinoa ma le faamaoni i tu ma aga tuufaatasia. O le faaipoipoga ma aiga e maualuga le taua, mo se faataitaiga, o tama ma tina ua i ai ni matafaioi paia ua tofiaina e faataunuu. Ua fautuaina tamaiti ma le autalavou ina ia ola i tulaga faatonuina faapitoa ma savavali i ala o loo fautuaina atu ina ia ausia ni sini faapitoa faaleaoaoga ma le faaleagaga.

O taunuuga o faamoemoega e oo mai i se olaga e faaautu tonu i le talalelei o loo taofia, o ni tulaga taua o loo fautuaina i tatou uma ina ia taumafai. E ui lava o nei tulaga taua o loo faavaeina i aoaoga faavae ma o se faailoga o se mea tatou te gauai i ai ma saili mo le ola e faavavau, ae e mafai i nisi taimi ona avea ma faapogai o le le fiafia ma le faaonoono mo i latou atonu e ese o latou olaga mai le mea e masani ai.

E ono tulai mai le popole ma faamoemoega e le taunuu, mo se faataitaiga, mo se tagata o le Ekalesia ua tetea ma lona toalua, mo se tagata o loo nofofua pea e ui o loo i le vaitausaga e faaipoipo ai, mo se tagata o loo tauivi mo sina taimi o le faavaivai po o se tulaga le lelei o le tausami, po o mo matua o se tamaitiiti ua fesea’i. O nisi tagata o le Ekalesia atonu e lagona le iloagofie faaleaganuu o i latou ia o loo i sina vaega itiiti, o e o loo tauivi ma lagona o le tosina i le itupa e tasi, po o o alii talavou po o le a lava se mafuaaga, ua filifili e le auauna atu i se misiona i le tausaga e masani ai. O tagata o le Ekalesia o e ua salamo ma o a latou agasala e manaomia ai le fono aoai faalauaitele faale-Ekalesia e masani foi i le tele o taimi ona lagona le matamuli i a latou fegalegaleaiga i le Ekalesia.

E tusa lava pe o agavaa i latou, o tagata o le Ekalesia o o latou olaga e le fetaui ma le tulaga taua ma o lea ua faitauina ai e ese mai, e tele lava ina lagona le tulaga maualalo ma le ta’usalaina. O nei faalogoga e faatupulaia pe a tatou le mafai ona faaeteete ma mafaufau totoa mo i latou e pei ona tatau ai i le avea ai o i tatou ma o latou uso ma tuafafine. Mafaufau, mo se faataitaiga, i se aafiaga le fuafuaina i se ulugalii ua faaipoipo ae le fananau pe a fesiligia i laua e se tagata o le uarota po o a fea o le a faia ai se la fanau, ma le lei iloaina ua leva ona la mananao e fai se la fanau ae le mafai.

A o tatou galulue i le foiaina o nei luitau, e taua lo tatou iloa o le tali e le o le faaitiitia pe tuu ai foi i se tulaga maualalo o le faavae. E i ai pea e le aunoa i perofeta ma aposetolo le tiute e aoao ma faamalosiauina i tatou e taumafai mo le mea e aupito sili ona taua. O le mea lena na faia e le Faaola. O Lana faatonuga o le “Ia atoatoa ona lelei o la outou amio” (Mataio 5:48), e le na o le “Ia manuia le aso.”

Sa oo mai i se taimi lata mai se fesoasoani i ni nai tausaga ua mavae atu a o ou faitau i le aoaoga a le Faaola e uiga i le tamaloa lea na se ese lana mamoe e tasi. Na fesili le Faaola, “Na te le tuua ea le ivagafulu ma le iva i mauga, a e alu o ia e saili i le na se? (Mataio 18:12).

I le avea ai o se taitai perisitua, e masani lava ona ou mafaufau ia te au lava ia mo le tele o tausaga o se leoleo mamoe—o le o loo sailia le mamoe na leiloa. Ae i se taimi o le toe tepa i tua, na oo mai ai ia te au i le isi itu e faapea, o tatou uma lava o lena mamoe e tasi na se ese. E i ai uma lava o tatou faaletonu, ma o o tatou olaga e i ai ala tatou te se ese mai ai i lena faavae. E eseese uma i tatou! O lenei faailoaga o se agaga maualalo ae fesoasoani foi.

E fesoasoani foi e manatua ai i le aoaoina o le tulaga taua, na silafia e le Faaola o lena tulaga taua e le mafai lava ona maua i se taimi vave. I le talanoaina o meaalofa faaleagaga—o na faaeega paia matagofie a le Agaga Paia—na fetalai mai le Faaola, “Ua tu’uina atu ia mea mo le lelei o e alolofa mai ia te au ma tausi a’u poloaiga uma.” I le tausia o poloaiga uma ina ia olioli i meaalofa faaleagaga e foliga mai o se tulaga faatonuina maualuga e faigata ona tausia, ae tatou te faafetai ai na faaopoopo e le Faaola na meaalofa faaleagaga mo le lelei “o e saili ma ole mai” (MFF 46:9; faaopoopoina le faamamafa). I le sailia o le tausia o poloaiga uma—e tusa lava pe tatou te faatamala i tulaga taua—o se mana o loo ia te i tatou taitoatasi ma e talia e le Tama Faalelagi.

Mai i le papatisoga sa tatou osi feagaiga uma “ina faanoanoa faatasi ma e faanoanoa; ioe, ma faamafanafana i e ua tatau i ai le faamafanafanaga” (Mosaea 18:9), i le agalelei ma tali atu i e o i ai ni manaoga faapitoa—o i latou o e ese mai—o se taumafaiga taua o le avea ai o i tatou ma soo o Keriso. Mo Iesu, na tusia e Nifae, “E le faia e ia se mea sei iloga e aoga ai i le lalolagi” (2 Nifae 26:24). O se mea e matua lē talitonuina le faapea, e faia e le Faaola se mea pe fofogaina se tulaga e ono faateteleina ai tiga ma faamanualia ai se isi o fanau a le Atua. O le mea moni, sa aoao e Alema o se vaega o le Toetu, sa ofoina mai e Keriso ma lona loto i ai ina ia lagonaina o tatou tiga, o gasegase, ma o latou vaivai ina “ia silafia e ia [atonu] e tusa ma le tino le ala e tausi a’i lona nuu” (Alema 7:12).

E mafai ona tatou avea le mafanafana i le atamai o Keriso e faatusa i o tatou lava aafiaga—o se tulaga faaletagata ua lauiloa o le malamalama i faalogoga o le isi tagata. O le talaaga o le misiona a Keriso e tumu i le faailoaina o Lona malamalama ma le agalelei i e sa ese mai.

Ina ua tuufaatasia le Tusipese a Tamaiti o loo i ai nei i le 1989, sa i ai se pese sa manaomia ona ta’u atu i fanau—aemaise i tatou uma—e uiga ia i latou e ese mai, o loo i ai se manaoga faapitoa o lo tatou alofa ma le malamalama. O lena pese faigofie, “Ou te Savali Ma Oe,” o loo lelei lona faapuupuuina o le ala tatou te faaali atu ai lo tatou alofa ma le malamalama:

Ia faamanuia mai le Atua ia tatou iloa, o se fuataga taua o lo tatou alualu i luma i le o mai ia Keriso, e maua lea i le lelei o a tatou amio e faia i isi, aemaise lava i latou o e ese mai. Ma ia tatou manatua o i tatou uma lava e i ai mea tatou te eseese ai.