O I Tatou Uma o Seevae

O tamaiti i le pitonuu fou o Ryan e o mai mai le salafa o le lalolagi: o Ausetalia, Kanata, Aikupito, Egelani, Initia, Kuwait, Mekisiko, Saudi Arabia, Sikotilani, o le Iunaite Setete, ma Viatename.

Na ofo Ryan i le feiloai atu i tagata mai le tele o atunuu, ae na ia matauina o nisi taimi e taaalo ai i le paka na o tamaiti e tautatala i le gagana e tasi. Sa lei malamalama Ryan pe aisea e le fia taaalo faatasi ai tagata, e tusa lava po o fea latou te o mai ai po o le a le gagana latou te tautala ai. O nisi taimi e saua ai tamaiti mai isi atunuu i tamaiti mai se isi atunuu. O le mea lena na faanoanoa ai Ryan.

Sa mafaufau Ryan po o le a lana mea e mafai ona fai, ae na faigata ona mafaufau i se mea. Sa le mafai ona ia fai atu i tagata uma ia avea ma ni uo—ona sa tele gagana eseese sa latou tautatala ai, latou te le malamalama ai.

I se tasi aso sa savalivali ai le aiga o Ryan i le auala. O nisi o tamaiti sa amio lē pulea na i ai i fafo. Sa uuina se tasi o i latou se polo lakapi. E fiafia foi Ryan e taalo i le lakapi. I le mauaina o lona lototoa, sa savali atu ai Ryan i le mea na i ai tama. Na ia iloa ni nai upu o le latou gagana, ma na latou iloa foi sina mea itiiti o lana gagana. Sa amata ona ataata ma talie Ryan ma nei alii a o latou faataitai i gagana eseese. Ona tusi lea o Ryan i le polo lakapi. “Tou te fia taaalo lapaki ma au?” sa ia fesili lemu atu ai, ma faamoemoe o le a latou malamalama. Sa atili ai ona ataata o ia.

Na tilotilo atu tamaiti ia te ia, ona tilotilo lea o le tasi i le isi. Sa latou talanoa mo se minute, ae sa le malamalama Ryan i upu. Ona latou toe tilotilo lea ia Ryan ma luelue o latou ulu. Na ataata Ryan, ma na latou tamomoe i le paka lata ane. Sa talotalo atu Ryan i ana uo ia e tautatala Faaperetania, ma se matamuli laitiiti, sa latou savavali mai. Sa faatu i lalo e se tasi o alii le polo lakapi, ma amata ai loa le taaloga.

O sina taimi mulimuli ane na fai ai se malologa faatopetope a Ryan e tamoe ai i le fale e inu se vai.

“O faapefea mai fafo i o?” O le fesili lea a tina.

“Lelei tele!” o le tala lea a Ryan. “E faapenei, Tina. O tatou uma o seevae!”

“Seevae?” O le fesili lea a tina.

“Ioe. E eseese uma i tatou, ae tatou te faaaogaina uma seevae e lua—ma e pau lena o le mea e manaomia mo le lakapi.”

“Lelei tele lou iloa,” o le tala lea a tina. “O outou uma o fanau a le Tama Faalelagi, ma e sili atu lo outou tutusa nai lo mea tou te mafaufauina.”

Sa talotalo atu Ryan a o ia toe tamoe atu i fafo o le faitotoa e taaalo ma ana uo fou.

Ina ua maea lena aso sa o tamaiti o le pitonuu i le paka i Aso Tofi uma e taaalo faatasi i le lakapi. E lei afaina po o a gagana na latou tautatala ai po o fea latou te o mai ai—o i latou uma o ni seevae, ma na lava lena.