O se Faiaoga e 10 Tausaga

Na osooso atu Chance e agai i totonu o le fale o le uso o lona tina ina ua maea se tietiega umi. Sa fiafia i latou ma lona tina ma lona uso laitiiti e asiasi atu ia te ia. “Talofa, Aunt Barbie!” Sa valaau leotele ai Chance a o ia fusiina le uso o lona tina. “E i ai ni au vali ma ni seleulu?”

Sa ataata Aunt Barbie ma faanofo lelei Chance i le laulau ai i le umukuka ma mea na ia manaomia.

Ao sauni e Aunt Barbie le meaai o le afiafi, sa ia vaai atu i le galuega faatino a Chance. “O le a lau mea na e tusi, Chance?” na ia fesili ai.

“O lea ou te valiina se ata na ou maua mai le Peraimeri, “o le tala lea a Chance. Na ia faatumuina ma le faaeteete ia ata na lanu uliuli ma lanu paepae i lanu sesega. “Pe a uma ona tatou aai, e mafai ona fai se tatou afiafi faaleaiga?” O le fesili lea a Chance. “E i ai se lesona ou te fia aoao atu.”

“Matuai lelei tele lena mea,” o le tala lea a Aunt Barbie. “Faafetai lava, Chance!”

Ina ua maea le meaai o le afiafi sa valaaulia e Aunt Barbie le tamaitai lea la te potu faatasi e auai i le afiafi faaleaiga. E le auai le tamaitai lea la te potu faatasi i le Ekalesia, ma sa ia fia iloa le ala ua faapotopoto ai le aiga.

Na amata e Chance le lesona i le fesili atu, “O fea sa tatou o mai ai?” Ona ia tuuina lea i luga o le ata sa ia valiina o le lalolagi o agaga. Sa fai nisi ana fesili ma faaali atu le ata felanulanuai o le fuafuaga a le Tama Faalelagi. Na iu lava, ina fesili mai Chance, “E i ai se tasi e iloa le igoa o lenei fuafuaga?”

Sa faapea mai le tamaitai e potu faatasi ma Aunt Barbie, “Ou te le iloa. O le a?”

“O le ata o le faaolataga,” o le tala lea a Chance, ma lana ataata. “Ona o lena, e mafai ona tatou faatasia e faavavau ma o tatou aiga.”

Ina ua maea le lesona, sa talanoa Aunt Barbie ia Chance. “Chance, ua e fesoasoani i le tamaitai ma te potu faatasi ia iloa le fuafuaga a le Tama Faalelagi. Faafetai lava,” o lana tala lea.

E lei fai mai se tala a Chance mo sina taimi. Ona ia fesili lea, “Aisea e ese ai la’u faalogo i totonu? Ua ou lagona le mafanafana ma le fiafia.”

“O le Agaga Paia lena o loo molimau atu ia te oe o mea sa e aoaoina e moni,” o le tala lea a Aunt Barbie. “Ou te mautinoa o loo fiafia le Tama Faalelagi ia te oe.”

Na i ai se ataata lapoa i foliga a Chance. Na fiafia o ia na mafai ona ia aoao se tasi e uiga i le ata o le fiafia a le Tama Faalelagi.