E Na Te Silafia Lo’u Igoa

Na valaaulia au e le Iunivesite o Uosigitone i le 2007 i se taumafataga e faamamaluina ai ana tamaitai taaalo. Na ou taalo tenisi i le iunivesite i le 44 tausaga ua mavae, ma na ma malo ai ma la’u paga taalo tenisi i le siamupini a le Northwest i le taitoalua. O le a faalauiloa aloaia ai a’u taumafaiga i le taumafataga lea.

Na ma pikiina ma lo’u toalua ia Lynda, o se uo mai o matou aso aoga, a o ma agai atu i le taumafataga. O ia foi lea na faafeiloaia a’u i Le Ekalesia a Iesu Keriso o le Au Paia o Aso e Gata Ai ina ua 33 ou tausaga. Na ma fiafia faatasi ai ina ua toe vaai i le matou lotoa muamua ma uo ua leva.

Ae peitai, ina ua ou alu atu e aumai se afifi ma le pine o i ai le igoa a o lei amataina le taumafataga, sa ou faanoanoa ina ua ou vaaia sa lolomiina i luga le igoa o “Sharon Krull,” ae le o Sherry Krull. “Ia, ua lelei,” na ou manatu ai, ma sa ou kolosi esea Sharon ma tusi ai Sherry. Ae na faaauau pea lea mea sese i le po atoa. Mulimuli ane i le afiafi, ina ua faalauiloa atu au e le taitai o se tasi e mauaina se taui, na ia valaauina au o “Sharon.” O le talita na ia tauaaoina mai ia te au na i ai foi le mea sese.

Sa le o se faafitauli tele; na ou faafetai na valaaulia au i le aiga, ma na folafola mai e i latou na faafoeina ma le gaoioiga o le a toe sui mai le talita ma tuu i ai le igoa sao.

O le aso na sosoo ai o le Aso Sa o le Eseta. Sa ma faaaluina ma lo’u toalua le Aso Faraile o le Aso Maliu i le malumalu ma faaaluina le tele o le taimi o le vaiaso e manatunatu ai i aso mulimuli o le Faaola i le fogaeleele. Ae o le vaega sili ona mamana o le Eseta na oo mai i lena tausaga i le taimi o le sauniga faamanatuga, ina ua fai e la matou epikopo lenei faamatalaga: “Ou te matua faafetai lava ona e silafia e le Alii lo’u igoa.”

Na ou lagonaina se olioli maoae ua ufitia ai au. E ui i le tele o lo’u fiafia na maua i le po ua mavae, o le fiafia na ou lagonaina i lenei upu moni na matuai sili atu i lo se isi lava mea na ou lagonaina mai le mauaina “o faamamaluga a tagata.”

Ou te matua faafetai foi ona e silafia e le Alii lo’u igoa, ae o le mea e sili ona taua, ua ou fiafia ina ua ou iloaina Lona suafa, i le 33 o o’u tausaga. Ou te faafetai ai pea e faavavau ina ua fesiligia e faifeautalai e toalua ia Lynda pe na te iloa se tasi e mafai ona la asia, sa lei fefe ina nei ou ita i le ta’uina ia i la’ua o lo’u igoa.

Na oo ina ou iloa le moni o le Faaola e ala i le faitauina o le Tusi a Mamona, lea o loo molimau ia te Ia. Ma ina ua ou iloaina le Faaola ma auai i Lana Ekalesia, sa avea au ma se tagata fou ia te Ia.

Na suia lo’u olaga i lena taimi, i lo’u papatisoga ma le faamauga, ma na toe suia foi i lena taeao maoae o le Eseta ina ua ou mauaina le molimau e silafia moni lava e le Tama Faalelagi ma le Faaola o tatou igoa. E le mafai ona ou faamatalaina atoatoa le olioli i le iloaina o le Tama Faalelagi ma le Faaola—ma le iloaina lea La te silafia au.