E Ala i Mea Faatauvaa ma le Faavalea

Pe a ou mafaufau i ou aafiaga a o ou talavou, ou te mafaufau i le faatupulaia o le tele o mea faatauvaa ma le faavalea lea na faamalosia ai la’u molimau (tagai i le Alema 37:6–7). O le uarota a o ou talavou sa pei o se aiga toatele. Pe a fai se matou aiga o le afiafi a le uarota, e o mai uma lava tagata. O taimi uma lava e faia ai le pasa a le Aualofa po o se solo a le Peraimeri, e o mai uma lava tagata. O la matou uarota o lo matou olaga faaagafesootai lea.

I lou toe mafaufau i tua i la’u faafiafiaga muamua o tala ma pese, ou te manatuaina lelei lava a matou faataitaiga na faia i vaveao, o tatalo, o talanoaga ma isi a o matou faatalitali i taimi e faatino ai a matou vaega, ma le lagona faauo a o matou valiina ata, faia faataitaiga, ma aoao faatasi ai. O taimi ia a o ou vaai atu i auala na galue ai le talalelei i olaga moni o tagata moni lava. Sa ou vaai i le ala na taulimaina ai e ou faufautua ia faafitauli, auala na tali mai ai taitai i tulaga mamafatu, auala na fesootai ai tane o le tasi i le isi, ma na ou faia ni filifiliga le leoa e uiga i le ola ai i mataupu o le talalelei lea na aoaoina ai au i le Aso Sa. Na ou lagonaina le Agaga a o matou tatalo mo se vavega, e pei o le manatuaina o la matou vaega po o le soifua maloloina o se tasi o le autalavou.

Ou te le manatuaina au upu tautala mai lena faafiafiaga, ou te le manatuaina uma foi isi tagata na auai. Ae ou te manatuaina le lagona na ou maua a o matou faafiafia ma a o ou vaai atu i foliga o tagata o la matou uarota ma vaaia lo latou taliaina ma lagonaina o lo latou alolofa.