O Tatou Aiga, O Tatou Auaiga
Aoaoina Atu O a Tatou Fanau mai Tusitusiga Paia
O loo i ai i fanau se tomai ofoofogia e malamalama ai i mataupu faavae o le talalelei.
Talu ai nei lava na ou feiloai atu ai i se vaega o tagata mai se isi faatuatuaga o e na matua faagaeetia lava i le naunautaiga o tagata o le Ekalesia e faasoa atu o latou taimi ma taleni e fesoasoani ai i isi. Na latou fia iloa pe faapefea ona tatou aoaoina a tatou fanau ia faapena.
Sa ou faamalamalama i ai o le aiga o le totonugalemu lea o le fuafuaga a lo tatou Tama Faalelagi ma ua i ai i matua le tiutetauave autu mo le aoaoina ma le faatonuina o a latou fanau. E lagolagoina e taitai ma faiaoga taumafaiga a matua.
O le faamoemoega ia tatou aoaoga uma lava, na ou tau atu ia i latou, o le faia lea o le mea na saunoa mai ai le Perofeta o Iosefa Samita na ia faia ina ua fesiligia pe na faapefea ona ia taitaia le Ekalesia: “Ou te aoao ia i latou mataupu faavae sao, ona latou pulea lea o i latou lava.”1
“Ma o a la na mataupu faavae?” na fesili mai ai le vaega. “O fea e te mauaina ai?”
“I afioga a Keriso,” o lau tali lea.
Taumamafa i Afioga a Keriso
O loo uunaia i tatou e Nifae ina ia “fiafia i afioga a Keriso; aua faauta, e faaalia mai ia te outou i le afioga a Keriso mea uma tou te faia” (2 Nifae 32:3).
E maua le afioga a le Atua i totonu o tusitusiga paia. Afai tatou te mananao ia malolosi a tatou fanau faaleagaga, o le a tatou aoaoina i latou mai tusitusiga paia ma fesoasoani ia i latou e aoao e taumamafa mai na itulau paia.
O loo i fanau se mana ofoofogia e malamalama ai i mataupu faavae o le talalelei. O i latou o e faitau i tusitusiga paia a o laiti e masani lava ona faia se tautinoga i totonu ia i latou lava e mulimuli ai i mataupu faavae lea na aoaoina ia i latou. O le mafuaaga lenei e tatau ai ona tofu tamaiti ma seti o tusitusiga paia. Latou te manaomia e aoao sao mai lava mai tusitusiga paia mea e finagalo lo latou Tama o i le Lagi ia i latou ia iloa ma faia.
Aoaoina o Fanau mai Tusitusiga Paia
E tele auala lelei e aoao ai fanau mai tusitusiga paia. Na ou iloaina le faapitoa o le aoga o lenei mamanu pe a uma ona faitau se mau:
-
Ia faailoa manino se aoaoga faavae.
-
Fesoasoani i le fanau ia malamalama i le aoaoga faavae.
-
Fesoasoani ia i latou e faaaoga le aoaoga faavae i o latou olaga.
-
Faamalosiau atu ia i latou e tatalo mo se molimau a le Agaga e faapea, e moni mea o loo latou aoaoina.
Ia faaaoga le Moronae 10:4 e fai ma faataitaiga. Faapea la o loo tuuina atu e se tina se lesona o le afiafi faaleaiga. Na te amata i le fai atu i tagata o le aiga e sue a latou kopi o le Tusi a Mamona ma faitau le fuaiupu: “Pe a maua e outou nei mea, ou te apoapoai atu ia te outou ia outou ole atu i le Atua, le Tama Faavavau, i le suafa o Iesu Keriso, pe le moni ea nei mea; afai tou te ole atu ai ma le loto faamaoni, ma le manatu tonu i ai, ma le faatuatua ia Kerso, na te faaalia le tonu i ai ia te outou i le mana o le Agaga Paia.”
Ona sosoo ai lea ma lona aveina o le aiga e faasolo atu i laasaga e fa o loo otooto atu i luga.
Faailoa Atu le Aoaoga Faavae. E fesili o ia: “O le a le mea e finagalo le Tama Faalelagi tatou te faia i lenei fuaiupu? Ma o le a le faamanuiaga ua Ia folafola mai ia i tatou pe afai tatou te faia le mea ua Ia fai mai ai?” E talanoaina e le aiga ia fesili ma filifili faapea e finagalo le Tama Faalelagi ia i tatou e faitau tusitusiga paia ona tatalo lea i le faatuatua, ma se faamoemoega faamaoni ina ia iloa le moni o mea na tatou faitau ai. Ua folafola mai e le Tama Faalelagi le tali mai o a tatou tatalo i le tuuina mai o se molimau o le upu moni e ala mai le Agaga Paia.
Malamalama i le Aoaoga Faavae. Sosoo ai ma le faasoa mai e le tina o le tala ia Iosefa Samita, o lē ina ua faitau i le Tusi Paia e mafai ona ia “ole atu i le Atua” (Iakopo 1:5), sa tatalo po o lē fea ekalesia e tatau ona auai. Na i ai lona faatuatua o le a tali mai lana tatalo. A o tatalo o ia, na faaali mai le Tama ma le Alo ia te ia. Na te faamanatu i le aiga, e moni lava, e le faaali le Tama Faalelagi ma Iesu Keriso i tagata uma o e tatalo, ae o le a tali mai e le Tama Faalelagi tatalo faamaoni i ala e Na te silafia e sili.
Faaaoga le Aoaoga Faavae. Na fesili se tamaitiiti, “O lona uiga la o le a tali mai le Tama Faalelagi i a’u tatalo?” Na tali atu le tina, “Ioe. Fai mai le Moronae e 10:4 o le suesue ma le tatalo o le a mafai ai ona tatou iloa le moni o mea uma lava.” Ona filifili lea o le aiga pe faapefea ona faia se suega o le folafolaga a Moronae.
Ole atu mo se Molimau. Na molimau atu le tina ma faasoa atu le ala na ia iloa ai e moni lenei mau. Na ia faaiuina le lesona i le tautino atu i le aiga o le a latou maua se faamaoniga fiafia o le upu moni e ala mai le molimau a le Agaga—pe a latou faia le mea na fai mai ai Moronae—o le suesueina lea o se mataupu faavae ma se naunautaiga ina ia iloa pe moni.
Aoaoina o Fanau i le Alii
A o tatou aoaoina a tatou fanau ia fiafia i tusitusiga paia ma aoao mai ia i latou, o le a tatou tuuina i o latou loto ma lima se punaoa matagofie o le malosi ma le taitaiga mo aso uma o totoe o o latou olaga. O le a tatou maua le faataunuuina o le folafolaga o loo tuuina mai i le 3 Nifae 22:13: “E aoaoina lau fanau uma lava e le Atua; e tele foi le manuia o lau fanau.”
O Mafaufauga Faaleagaga i Aso Uma ma Tamaiti Laiti
I le avea ai ma se tina o tamaiti laiti, na amata ona ou tatalo i aso uma ina ia ou iloa mea e manaomia ona aoao e la’u fanau. O le tali e masani lava o mea e sili ona taua e aoao atu o upu moni faavae o le talalelei ma le tomai e galue ai. O taeao uma ma te faasoa atu ai ma lo’u toalua se mafaufauga faaleagaga ma a ma’ua molimau i le ma fanau laiti. Pe a ma le 30 minute o le sauniuniga i Aso Sa taitasi, ae mafai ai ona ma ao maia ni mea e faaaoga mo le vaiaso. E matua sili lava ona aoga ata tusi o le talalelei, pese o le Peraimeri, Tala o le Feagaiga Tuai, ma manatu mai mekasini o le Ekalesia.
-
Ata o le Talalelei. Talu ai e matua aoga lava le aoao atu ma ata, ua ou iloa e fesoasoani tele le lolomiina o ata mai le gospelart.lds.org. O le auala lena e mafai ai ona tatou avatua se ata faatusa ia tatou fanau iti, ma e mafai ona latou tilotilo ma tagotago i ai a o tatou talanoa i mea tatou te vaaia.
-
Pese o le Peraimeri. O nisi taimi matou te taumafai ai e aoao faatasi se pese o le Peraimeri, ae maise lava pese e fai taga ma feminoiai.
-
Tala o le Feagaiga Tuai. Matou te faitauina na o le itulau e tasi i le aso. A o lei faitauina, e masani lava ona i ai se ata po o se lesona faatino e faamalosia ai tala ua uma ona talanoaina. Mo se faataitaiga, na ou tuuina le vai lanu mumu i le vai i se tasi aso ma fesili atu ia i latou pe latou te manatuaina se taimi i totonu o tusitusiga paia na faaliliu ai e le Alii le vai i le lanu mumu.
-
Mekasini a le Ekalesia. O nisi taimi matou te faasoaina se savali e ala atu i se gaoioiga e fesootai ma le talalelei. Mo se faataitaiga, na matou lolomiina i se tasi taimi ni nai kopi o se ata lea na faaalia ai tamaiti o tufatufaina ni kuki i tagata matutua. Sa matou talanoaina faatasi, le taua o le alofa ma le auauna atu i “tina ma tama matutua.” Ona osiosi lea e le ma tamaitiiti e tasi le tausaga i lena taimi ni nai maka i le ata a o saili e le ma tama e a’oga faataitai mea o loo nana i totonu.
O le faasoaina atu o se mafaufauga faaleagaga e na o ni nai minute lava, a o le aafiaga e umi lava. O nisi taimi e se’i ai e le ma tamaitiiti e a’oga faataitai le mekasini ma faateia au i le toe faamatalaina o nisi o tala ma mataupu faavae na matou aoaoina. A o faasolo ina matutua le ma fanau, o loo faaauauina pea la matou faigalotu o le taeao—e oo lava i taeao pisi, pe a tele ina matou faasoaina se savali puupuu a’o faamae’a a latou ti o le taeao.
Ou te faafetai mo le tele o punaoa ‘anoa ua tuuina mai e le Ekalesia e fesoasoani ia i tatou e tausisia ai le latalata o a tatou fanau i le Agaga. A o tatou sauniuni i vaiaso taitasi, tatou te talisapaia ia faaaliga e maua e le tagata lava ia e aoao ai a tatou fanau. Ma e tatou te latalata atili i le Tama Faalelagi pe a tatou sailia ala sili e faalatalata atili atu ai a tatou fanau ia te Ia.
Alejandra Adams, Virginia, ISA