Peresitene Marion G. Romney (1897–1988)

Na soifua mai Marion G. Romney i le alalafaga o le Au Paia o Aso e Gata Ai o Colonia Juárez i Mekisiko ma na soifua ai iina seia oo ina ua tusa ma le 15 ona tausaga. O se feteenaiga faaupufai na amata i le 1910 na faamalosia ai le aiga o Romney ma isi e tuua mea uma ae sosola i le Iunaite Setete. “Sa faigata tele ona maua ni galuega,” na manatuaina e Peresitene Romney. “Na manaomia lo matou tausia o i matou lava ia po o le feoti.”¹ (“Root hog or die” o se faaupuga faaAmerika o lona uiga o le tausia e se tasi o ia lava.)

I na tausaga faigata, a o nonofo i Oakley, Idaho, sa tuu faatasi e le tama o Marion ma lona uso mea e tausi ai o la aiga. I se tasi masina sa na o le 80 tala le latou tupe na i ai e totogi ai mea sa manaomia mo tagata e to’a 17 i aiga e lua. Faamata e malamalama le Alii pe a latou le totogia le sefuluai i le taimi nei? Na latou taliina le fesili i le auina atu o le alii laitiiti o Marion i se aso malulu o le taumalulu e tuuina atu le sefuluai i le epikopo. Ina ua mavae lena mea, na ia saunoa mai, o le a le toe faigata faapena le totogiina o le sefuluai.

Na malamalama lelei Marion G. Romney i le mativa faapea foi le galue malosi. Na faauu o ia mai le aoga maualuga i le 1918, auai i le Kolisi o Ricks mo tausaga e lua, ma auauna atu i se misiona i Ausetalia. Ina ua maea lana misiona na ia faaipoipo atu ia Ida Jensen i le Malumalu o Sate Leki i le 1924. A o faigaluega, sa ia auai i le Iunivesite o Polika Iaga ma mulimuli ane pasi lana suega faaloia i le 1929 ina ia avea ma loia.

A o avea ma epikopo i le Aai o Sate Leki i le taimi o le pagatia i le Pa’ū Tele o le Tamaoaiga, sa matuai punouai o ia i le atiina ae o le polokalama o le uelefea a le Ekalesia. Mulimuli ane, i le avea ai ma se Fesoasoani i le Korama o Aposetolo e Toasefululua ma sosoo ai e avea ma se Aposetolo, sa faaauau lona fesoasoani atu i le faaleleia ma vaaia le faafoega o lena polokalama.

Mai le 1972 i le 1985 sa i ai o ia i le Au Peresitene Sili o se fesoasoani ia Peresitene Harold B. Lee ma sosoo ai ia Peresitene Spencer W. Kimball. Na maliu Peresitene Romney i le 90 tausaga o lona soifua a o avea ma Peresitene o le Korama a Aposetolo e Toasefululua.