Buk blong Momon

Hem i wan long ol fo buk blong skripja we Jos Ia blong Jisas Kraes blong Ol Lata-dei Sent i akseptem. Hem i wan sot histri, we wan profet blong bifo, we nem blong hem i Momon, i raetem abaot histri blong ol pipol we oli bin stap laef long Ol Amerika. Oli bin raetem blong i testifae se Jisas i Kraes. Long saed blong histri ia, Profet Josef Smit, we i bin transletem tru long presen mo paoa blong God, i bin talem: “Mi bin talem long ol brata se Buk blong Momon i moa stret long eni narafala buk long wol, mo i ki ston blong relijin blong yumi, mo wan man bae i kam moa kolosap long God sapos hem i folem ol tijing blong hem, bitim eni narafala buk” (luk long fas toktok long fored blong Buk blong Momon).

Buk blong Momon i wan histri blong relijin blong trifala grup blong ol pipol we oli aot long Olfala Wol i go long graon blong Amerika. Ol grup ia, ol profet oli lidim olgeta, mo oli rekodem ol histri blong olgeta abaot relijin mo abaot ol nara samting long ol buk we oli wokem long aean. Buk blong Momon i rekodem visit blong Jisas Kraes long ol pipol long Ol Amerika afta we Hem i bin laef bakegen long ded. Wan taem blong tu handred yia blong pis i bin stap afta long visit ia blong Kraes.

Moronae, las profet blong Ol Man blong Nifae blong raetem histri, i silim ol sot histri blong ol pipol ia, mo i bin haedem olgeta samples long 421 Afta Kraes i Bon (A.K.B.). Long 1823, Moronae, we i laef bakegen long ded, i bin visitim Josef Smit, mo afta, i givim ol tabu buk ia blong bifo i go long Josef, blong Josef i transletem olgeta, mo i tekem i kam long wol olsem wan narafala testeman blong Jisas Kraes.