Luk
Hem i man we i raetem Gospel blong Luk mo buk blong Ol Wok long Niu Testeman mo hem i wan misinari kompanion blong Pol. Hem i bon long papa mo mama we tufala i blong Gris, mo i stap olsem dokta (Kol 4:14). Luk i bin skul gud. Hem i talemaot se hem i kompanion blong Aposol Pol taem hem i joenem Pol long Troas (Wok 16:10â11). Luk i bin stap tu wetem Pol long Filipae long las wokbaot blong Pol i go long Jerusalem (Wok 20:6), mo tufala i bin stap tugeta kasem taem we tufala i kasem Rom. Luk i bin stap tu wetem Pol long taem we oli sarem hem nambatu taem long taem blong rul blong Rom (2Â Tim 4:11). Oli talem se hem i ded from bilif blong hem.
Gospel blong Luk
Wan histri we Luk i raetem abaot Jisas Kraes mo seves blong Hem long wol ia. Buk blong Ol Wok blong Ol Aposol i nara pat blong Gospel blong Luk. Luk i bin livim wan gudfala histri we hem i raetem long saed blong seves blong Jisas, mo i presentem Jisas olsem Sevya blong Ol Man Jiu mo blong Ol Jentael. Hem i bin raetem plante abaot ol tijing blong Jisas mo ol wok we Hem i bin mekem. Long Luk, yumi kasem nomo ol stori blong ol visit blong Gabriel i go long Sekaraea mo Meri (Luk 1); visit blong ol man blong lukaot long sipsip i go long bebi Jisas (Luk 2:8â18); Jisas long tempol taem hem i gat twelef yia (Luk 2:41â52); taem Jisas i givim wok long olgeta seventi mo i sendem olgeta (Luk 10:1â24); Jisas i swet blong hem i olsem blad (Luk 22:44); storian blong Jisas wetem stilman long kros (Luk 23:39â43); mo Jisas we i kakae fis mo sugabag afta we Hem i laef bakegen long ded (Luk 24:42â43).
Blong kasem wan lis blong ol samting we i bin hapen long laef blong Sevya we oli tokbaot long Gospel blong Luk, luk long Agrimen Bitwin Ol Buk blong Gospel insaed long Apendiks.