Nifae, Boe blong Lihae

Long Buk blong Momon, hem i wan boe we i stret mo gud blong Lihae mo Saraea (1 Nif 1:1–4; 2:5). Nifae i gat strong fet long toktok blong God (1 Nif 3:7) mo i kam wan bigfala profet, i holem ol rekod, mo i lidim ol pipol blong hem.

Hem i bin stap obei mo stap prea wetem fet, 1 Nif 2:16.
Hem i gobak long Jerusal blong kasem ol buk we oli wokem long bras, 1 Nif 3–4.
I gobak long Jerusalem blong tekem famli blong Ismael i go long ples we i no gat man long hem, 1 Nif 7.
Hem i kasem semfala visen we Lihae i kasem, 1 Nif 10:17–22; 11.
Hem i luk, long visen, fiuja blong ol pipol blong hem, mo restoresen blong gospel, 1 Nif 12–13.
Hem i talemaot mining blong visen blong tri blong laef, 1 Nif 15:21–36.
Hem i brekem bo blong hem be tru long fet, hem i save kasem kaekae, 1 Nif 16:18–32.
Hem i bildim wan sip mo i sel i go long graon blong promes, 1 Nif 17–18.
Ol Man blong Nifae mo Ol Man blong Leman oli seperet, 2 Nif 5.
I talemaot las testemoni blong hem, 2 Nif 33.

Buk blong 1 Nifae

Ol japta 1–18:8 oli tokbaot plante profet Lihae mo famli blong hem we oli stap aot long Jerusalem. Oli travel pasem ol draeples we i no gat samting long hem kasem taem oli kasem solwota. Fas Nifae 18:9–23 i tokbaot travel blong olgeta i go long wan graon blong promes, olsem we Lod i talem, nomata we Leman mo Lemyul, tufala i agens. Ol japta 19–22 oli tokbaot stamba tingting blong Nifae blong kipim ol rekod (1 Nif 6; 19:18)—blong winim tingting blong evriwan blong save tingbaot Lod, we i Ridima blong olgeta. Hem i talem ol toktok blong Aesea (1 Nif 20–21) mo i talem mining blong ol mesej blong Aesea, wetem hop se evriwan bae i kam blong save Jisas Kraes olsem Sevya mo Ridima blong olgeta (1 Nif 22:12).

Buk blong 2 Nifae

Ol japta 1–4 oli tekem sam long ol las tijing blong Lihae mo ol profesi bifo hem i ded, wetem ol blesing long ol boe blong hem mo laen blong olgeta. Japta 5 i eksplenem from wanem Ol Man blong Nifae oli seperetem olgeta long Ol Man blong Leman. Ol Man blong Nifae oli bildim wan tempol, oli tijim loa blong Moses, mo oli kipim ol histri. Ol japta 6–10, oli holem ol toktok blong Jekob, yangfala brata blong Nifae. Jekob i luklukbak long histri blong Juda mo i bin talem profesi blong Mesaea, sam we hem i tekem long ol raeting blong profet Aesea. Long ol japta 11–33, Nifae i raetemdaon testemoni blong hem abaot Kraes, testemoni blong Jekod, ol profesi blong las dei, mo samfala japta we oli kamaot long buk blong Aesea long OlTesteman.