Wan we God i singaotem hem mo i stap toktok long bihaf blong God. Olsem wan mesenja blong God, wan profet i kasem ol komanmen, ol profesi, mo ol revelesen we oli kam long God. Responsabiliti blong Hem i blong talemaot tingting blong God mo tru fasin blong God long ol man, mo blong soemaot mining blong ol wok blong God wetem olgeta. Wan profet i talemaot wanem i sin, mo i talemaot fastaem finis wanem bae i risal blong sin. Hem i wan man we i stap prijim stret mo gud fasin. Long wanwan taem, bae ol profet i save kasem insperesen blong talemaot fiuja blong gud blong ol man. Fasfala responsabiliti blong hem i blong stap olsem wan witnes blong Kraes. Presiden blong Jos Ia blong Jisas Kraes blong Ol Lata-dei Sent i wan profet blong God long wol tedei. Ol memba blong Fas Presidensi mo Olgeta Twelef, oli sastenem olgeta olsem ol profet, ol sia mo ol reveleta.