Moses

Wan profet blong OlTesteman we i lidim Ol Man Isrel aot long fasin blong stap slef long Ijip, mo i givim olgeta samfala loa long saed blong relijin, long saed blong laef, mo long saed blong kaekae, olsem we God i bin talemaot long hem.

Seves blong Moses i go bitim ol limit blong laef blong hem long wol ia. Josef Smit i tijim se, wetem Elaeja, hem i kam long Hil we Jisas i Jenis I Kam Narafala mo i givim ol ki blong prishud long Pita, Jemes, mo Jon (Mat 17:3–4; Mak 9:4–9; Luk 9:30; D&K 63:21).

Moses i kamaot long Josef Smit mo Oliva Kaodri long 3 Epril 1836, long tempol long Ketlan, Ohaeo, mo i givim long tufala ol ki blong karem Isrel i kambak tugeta (D&K 110:11).

Revelesen blong lata-dei i tokbaot plante samting long saed blong Moses. Oli tokbaot hem fulap insaed long Buk blong Momon; mo long Doktrin mo Ol Kavenan yumi lanem abaot seves blong hem (D&K 84:20–26), mo we hem i bin kasem prishud long palika blong hem, Jetro (D&K 84:6).

Revelesen blong lata-dei i talemaot tu stori blong Baebol blong seves blong hem long medel blong ol pikinini blong Isrel mo i talemaot bakegen se hem nao i bin raetem ol faevfala buk long stat blong OlTesteman (1 Nif 5:11; Moses 1:40–41).

Gel blong King blong Ijip i sevem hem, Eks 2:1–10.
I ronwe i go long Midian, Eks 2:11–22.
Enjel blong Lod i kamaot long hem long wan smol bus we faea i laet long hem, Eks 3:1–15.
I talemaot ol bigfala nogud samting we bae i kam long Ol Man Ijip, Eks 7–11.
Lod i statem Pasova, Eks 12:1–30.
I lidim ol pikinini blong Isrel oli krosem Red Si, Eks 14:5–31.
Lod i sendem mana long olgeta long draeples, Eks 16.
I kilim wan ston long Horeb mo wota i kamaot long hem, Eks 17:1–7.
Eron mo Huru i helpem ol han blong hem blong mekem se Josua i winim Amalek, Eks 17:8–16.
Jetro i givim kaonsel long hem, Eks 18:13–26.
I mekem ol pipol oli rere blong Lod i kamaot long hil Sinae, Eks 19.
Lod i talemaot olgeta Ten Komanmen long hem, Eks 20:1–17.
Hem mo olgeta seventi elda oli luk God, Eks 24:9–11.
I brekem ol tebol blong testemoni mo i kapsaetem i prapa spolem gud yang buluk we oli wokem long gol, Eks 32:19–20.
I toktok wetem God we i luk fes blong hem, Eks 33:9–11.

Buk blong Moses

Wan buk insaed long Perel we I Gat Bigfala Praes we i tekem translesen blong Josef Smit we i kam long hem tru long insperesen, blong olgeta fas seven japta blong buk blong Jenesis.

Japta 1 i tokbaot wan visen we, long hem, Moses i luk God; mo God i talemaot long hem ful plan blong fasin blong sevem man. Ol japta 2–5, oli wan stori blong Kriesen mo Foldaon blong Adam. Ol japta 6–7 oli tokbaot wan visen abaot Inok mo seves blong hem long wol ia. Japta 8 i tokabaot wan visen abaot Noa mo Bigfala Wota.

Ol faef buk blong Moses

Ol fas faef buk insaed long OlTesteman, oli save olgeta olsem ol buk blong Moses. Ol buk we oli wokem long bras we Nifae i tekem olgeta long Leban, oli holem ol buk blong Moses (1 Nif 5:11).