Deved

Wan king blong Isrel blong bifo long OlTesteman

Deved i wan boe blong Jese blong laen blong Juda. Hem i wan yangfala we i gat paoa long tingting, mo hem i bin kilimded wan laeon, wan bea, mo wan bigfala man Filistia, Golaeat (1 Saml 17). Oli jusum mo putum Deved i kam king blong Isrel. Semmak olsem Sol, long laef blong hem olsem wan adalt, hem i rong long ol bigfala kraem; be wanem i mekem hem i defren long Sol i we hem i bin save sakem sin wetem tru hat blong hem. From hemia, hem i bin save kasem fogivnes, be i no kasem fogivnes from hem i bin kilimded Uraea (D&K 132:39). Laef blong hem, oli save serem long fo pat: (1) long Betlehem, taem hem i bin wan man blong lukaot long sipsip (1 Saml 16–17); (2) insaed long haos blong King Sol (1 Saml 18:1–19:18); (3) olsem wan man we i stap ronwe (1 Saml 19:18–31:13; 2 Saml 1); (4) olsem wan king ova long laen blong Juda long Hebron (2 Saml 2–4), mo afta, olsem wan king ova long ful Isrel (2 Saml 5–24; 1 King 1:1–2:11).

Afta we Deved i mekem sin ia blong mekem adaltri wetem Batseba, i bin gat fulap nogud samting we i spolem ol las twante yia blong laef blong hem. Ful nesen i bin kam antap gud long taem blong rul blong hem, be Deved hemwan, i bin safa from ol risal blong ol sin blong hem. Oltaem i gat raorao long famli, we long kes blong Abasalom mo Adonia, i mekem se oli bin gat bigfala faet. Ol samting ia we oli bin hapen, oli kam blong mekem wanem profet Netan i bin talem i kamtru, hemia long saed blong Deved mo sin blong hem (2 Saml 12:7–13).

Nomata ol nogud samting ia long laef blong hem, rul blong Deved i bin wan rul we i gud tumas long histri blong Ol Man Isrel, from se (1) hem i bin mekem ol laen oli kam wan nesen, (2) hem i kasem ol graon blong kantri mo i no gat raorao from, (3) hem i stanemap gavman blong hem folem tru relijin blong mekem se tingting blong God i bin stap olsem loa blong Isrel. From ol risen ia, longtaem afta, oli stap luk se rul blong Deved i olsem wan taem blong gol mo bigfala taem blong glori taem we bae Mesaea bae i kam (Aes 16:5; Jerem 23:5; Esik 37:24–28).

Laef blong Deved i soemaot pikja blong nid blong evriwan blong mas stap strong long stret mo gud fasin i go kasem en. Olsem wan yut, oli stap talem se hem i wan man we i folem stret hat blong Lod (1 Saml 13:14); olsem wan man, hem i bin toktok wetem Spirit mo hem i bin kasem plante revelesen. Be hem i pem wan hevi praes from se hem i no bin obei long ol komanmen blong God (D&K 132:39).