Timoti, Leta I Go long

Pol i raetem fas leta afta fas taem we hem i go long kalabus. Hem i livim Timoti long Efesas, wetem tingting blong gobak (1 Tim 3:14). Be Pol i filim se ating bae i let blong kambak, mekem se hem i raet i go long Timoti, ating taem hem i stap long Masedonia (1 Tim 1:3).

Japta 1 i tekem griting blong Pol, mo tu, instraksen blong hem long samfala krangke toktok we i stap kasem Jos. Ol japta 2–3 oli givim daereksen abaot pablik wosip mo long saed blong fasin mo wei blong laef blong ol wokman blong God. Ol japta 4–5 oli tokbaot apostasi blong las dei mo wan advaes i go long Timoti long wei blong givhan long olgeta we hem i stap lidim. Japta 6 i wan toktok blong askem strong evriwan blong oli stap fetful mo oli stap longwe long ol samting blong wol.

Pol i raetem wan seken leta long taem we hem i go kalabus long seken taem, i no longtaem bifo oli kilimded hem from bilif blong hem. Buk ia i tekem ol las toktok blong Aposol ia mo i soem bigfala paoa long tingting blong hem mo tras we hem i gat taem hem i fesem ded.

Japta 1 i tekem griting blong Pol mo wok we hem i givim long Timoti. Ol japta 2–3 oli givim ol woning mo ol daereksen, wetem wan jalenj blong fesem ol denja we oli stap. Japta 4 i wan mesej i go long ol fren blong Pol, we i wan advaes long wei blong lukluk long olgeta we oli mekem apostasi.