Samuel, Profet blong OlTesteman

Boe blong Elkana mo Ana, Samuel i bon olsem ansa blong ol prea blong mama blong hem (1 Saml 1). Taem hem i bin pikinini, oli putum hem i stap wetem Ilae, we i hae pris long tabenakol long Silo (1 Saml 2:11; 3:1). Lod i singaotem Samuel taem hem i yangfala blong hem i kam olsem profet (1 Saml 3). Afta ded blong Ilae, Samuel i kam hae profet mo jaj blong Isrel mo i putumbak loa, oda, mo ol stret taem blong wosip long saed blong relijin long graon (1 Saml 4:15–18; 7:3–17).

Fas Samuel 28:5–20 i tokbaot stori blong Samuel we wan woman Endoro we i toktok wetem devel i mekem hem i kambak long olgeta dedman, hemia folem wanem we King Sol i askem. Hemia i no wan visen we i kam long God, from se woman we i toktok long devel, o nara wei long saed blong spirit, i no save fosem wan profet blong kamaot long rikwes blong hem.

Ol buk blong Fas mo Seken Samuel

Long samfala Baebol, ol buk blong Fas mo Seken Samuel oli stap long wan buk nomo. Long sam narafala oli tu seperet buk. Ol buk oli tokbaot samting we i hapen blong samples 130 yia, stat long taem we Samuel i bon i kam long wol kasem taem jes bifo long ded blong King Deved.

Buk blong Fas Samuel

Ol japta 1–3 oli tokbaot se Lod i singaotem trabol i kam long famli blong Ilae mo i panisim olgeta, mo i singaotem Samuel olsem hae pris mo jaj. Ol japta 4–6 oli tokbaot olsem wanem bokis blong promes i foldaon long han blong Ol Man Filistia. Ol japta 7–8 oli rekodem ol woning blong Samuel long saed blong fasin blong gat ol giaman god mo wan nogud king. Ol japta 9–15 oli tokbaot we oli putum Sol i kam king, mo rul blong hem olsem wan king. Ol japta 16–31 oli talem histri blong Deved mo olsem wanem hem i kasem paoa—Samuel i anoentem Deved we i bin kilim ded Golaeat. Sol i no laekem Deved nating, be Deved i no wantem kilimded Sol, nating we hem i bin gat janis blong mekem.

Buk blong Seken Samuel

Buk ia i tokbaot ol ditel blong rul blong Deved olsem king blong Juda, mo laswan, olsem king blong ful Isrel. Ol japta 1–4 oli soemaot longfala hadwok bitwin olgeta we oli stap folem Deved afta we Juda i putum hem i king, mo olgeta man we oli stap folem Sol. Ol japta 5–10 oli soemaot Deved we i kasem moa paoa truaot long ol kantri. Ol japta 11–21 oli soem olsem wanem Deved i foldaon long paoa long saed blong spirit from ol sin blong hem mo from fasin blong agens insaed long famli blong hemwan. Ol japta 22–24 oli tokbaot olsem wanem Deved i traem blong kam joen bakegen wetem Lod.