Revelesen blong Jon

Las buk long Niu Testeman, we i gat wan revelesen we God i givim long Aposol Jon. Hem i bin kasem raet blong luk histri blong wol, speseli ol las dei (Rev 1:1–2; 1 Nif 14:18–27; D&K 77). Revelesen blong Jon, oli save tu olsem Apokalip.

Jon i kasem revelesen ia long dei blong Lod long aelan blong Patmos (Rev 1:9–10), aotsaed long kos blong Esia, i no longwe long Efesas. Stret deit blong revelesen ia, oli no save.

Ol ki blong andastanem buk ia i stap long Fas Nifae 14:18–27 mo Doktrin mo Ol Kavenan 77 (Ita 4:15–16).

Ol japta 1–3 oli wan fas toktok long buk ia mo ol leta we oli go long ol seven jos long Esia. Jon i bin raetem ol leta ia blong helpem olgeta Sent blong stretem samfala problem. Ol japta 4–5 oli rekodem ol visen we Jon i kasem we i soem bigfala mo stret mo gud paoa blong God mo Kraes. Long ol japta 6–9, mo 11, Jon i rekodem we hem i luk wan buk we i lok wetem seven sil, mo wanwan sil i ripresentem wan taosen yia blong histri blong wol ia. Ol japta ia oli lukluk long ol samting we oli stap long namba seven sil (luk long Rev 8–9; 11:1–15). Japta 10 i tokbaot wan buk we Jon i kakae. Buk ia i representem wan misin long fiuja we bae hem i mekem. Japta 12 i rekodem wan visen blong nogud fasin we i stat long heven taem Setan i go agensem God mo God i sakemaot hem. Wo ia we i stat longwe i gohed long wol ia. Long ol japta 13, 17–19, Jon i tokbaot ol kingdom blong wol ia we oli nogud, we Setan i kontrolem mo i talemaot we oli lus, mo i tokbaot tu las taem we bae God i prapa spolem gud devel. Ol japta 14–16 oli tokbaot stret mo gud fasin blong olgeta Sent long medel blong ol nogud samting stret bifo Seken Kaming blong Kraes. Ol japta 20–22 oli tokbaot Mileniom, wan naesfala siti blong Niu Jerusalem, mo ol las samting we i hapen long histri blong wol.