Job

Nomata we buk blong Job i abaot safaring, hem i no talem stret from wanem Job (o eni narawan) bae i save gotru long sobodi, mo i save lusum famli blong hem mo ol samting blong hem. Buk i mekem i klia se blong gat hadtaem i no minim se wan i mekem sin. Lod i save yusum hadtaem blong wan i kasem eksperiens, i gat disiplin, mo i kasem instraksen, mo tu, i save yusum hadtaem blong givim panismen (D&K 122).

Buk ia, oli save seraotem long fo pat. Ol japta 1–2 oli wan fas toktok long stori. Ol japta 3–31 oli tokbaot samfala storian bitwin Job mo trifala fren. Ol japta 32–37 oli tekem ol toktok blong Elihu, wan nambafo fren blong hem, we i tok long Job from samfala risen we i defren long ol risen blong ol fas trifala fren blong Job. Ol japta 38–42 oli endem buk wetem wan gud toktok i go long Job se rod blong hem long laef i bin wan gudfalawan stat long stat.

Buk blong Job i tijim se sapos wan i gat stret save abaot God mo i stap laef long wan laef we i stret long ae blong God, bae hem i save stanap strong gud moa long taem we ol tes oli kam long hem. Fet blong Job we i no foldaon i kamkamaot tru long ol toktok wetem ol strong tok olsem “Nating sipos God i kilim mi mi ded, be tingting blong mi bambae i stap strong long hem nomo” (Job 13:15). Oli tokbaot Job tu long Esikel 14:14; Jemes 5:11; Doktrin mo Ol Kavenan 121:10.