Jerusalem

Wan taon we i stap long Isrel blong tedei. Hem i siti long histri blong Baebol we i moa bigwan. Sam long ol tabu ples blong ol Kristin man, Ol Jiu mo ol Muslim oli stap long taon ia mo plante fetful man oli stap visitim. Plante taem oli singaotem tabu o holi siti.

Long wan taem oli singaotem taon ia Salem (Jen 14:18; Sam 76:2); Jerusalem i wan siti blong ol man Jebus kasem taem we Deved i holem siti ia (Jos 10:1; 15:8; 2 Saml 5:6–7), mo i mekem i kam kapitol siti. Bifo long taem ia, hem i stap olsem wan strong haos long hil, we i stap kolosap 800 mita antap long level blong solwota. Raon long hem i gat ol dip ples long evri saed, be long Not saed nomo i no gat.

Long taem blong rul blong King Deved long Jerusalem, hem i bin stap long wan bigfala haos we oli wokem long wud. Be, long taem blong rul blong Solomon, ol pipol oli bin mekem plante samting blong mekem taon ia i kam naes, mo hemia i tekem tu bigfala haos blong king mo tempol.

Afta we ol kingdom blong Isrel mo Juda i seraot, Jerusalem i stap nomo olsem kapitol siti blong Juda. Plante taem ol ami blong enemi oli kam tekova (1 King 14:25; 2 King 14:13; 16:5; 18–19; 24:10; 25). Anda long rul blong Hesekia, Jerusalem i kam stap long medel blong ol wosip blong relijin, be haf i go lus long 320 B.K.B., 168 B.K.B., mo 65 B.K.B. Herod i bin bildimbak ol wol mo tempol, be long 70 A.K.B., Ol Man Rom oli prapa spolem taon ia evriwan.