Yusufu, Mwana wa Yakobo

Katika Agano la Kale, ni mwana mzaliwa wa kwanza wa Yakobo na Raheli (Mwa. 30:22–24; 37:3).

Yusufu alijipatia haki ya uzaliwa wa kwanza katika Israeli kwa sababu Reubeni, mwana mzaliwa wa kwanza wa mke wa kwanza wa Yakobo, alipoteza haki hii kwa uvunjaji wa sheria (1 Nya. 5:1–2). Kwa sababu alikuwa mtu mwenye kustahili, Yusufu, kama mwana mzaliwa wa kwanza wa mke wa pili wa Yakobo, alikuwa ndiye anayefuatia katika mstari kwa ajili ya baraka hiyo. Yusufu pia alipokea baraka kutoka kwa baba yake muda mfupi tu kabla ya Yakobo kufa (Mwa. 49:22–26).

Yusufu alikuwa mtu mwadilifu sana “mwangalifu na mwenye hekima” (Mwa. 41:39). Kumkatalia kwake mke wa Potifa ni mfano wa imani, usafi wa kimwili, na uadilifu wa kibinafsi (Mwa. 39:7–12). Katika Misri, wakati Yusufu alipofunua utambulisho wake wa kweli kwa kaka zake, aliwashukuru badala ya kuwashutumu kwa jinsi walivyomtendea yeye. Aliamini matendo yao yamesaidia kutimiza mapenzi matakatifu ya Mungu (Mwa. 45:4–15).

Ufunuo wa siku za mwisho unafunua huduma ya familia ya Yusufu katika siku za mwisho (TJS, Mwa. 50:24–38 [Kiambatisho]; 2 Ne. 3:3–24; 3 Ne. 20:25–27).

Yakobo alimpenda sana Yusufu na akampa kanzu ya rangi nyingi, Mwa. 37:3.
Kwa sababu ya wivu, kaka zake Yusufu wakaanza kumchukia na kupanga njama za kumwua, lakini badala yake wakamwuza kwa wafanya biashara, waliokuwa njiani wakienda Misri, Mwa. 37:5–36.
Akiwa Misri, Bwana alimneemesha Yusufu na akawa mtawala wa nyumba ya Potifa, Mwa. 39:1–4.
Mke wa Potifa alidanganya, akisema kuwa Yusufu alijaribu kumtongoza yeye; Yusufu alihukumiwa kimakosa na akawekwa gerezani, Mwa. 39:7–20.
Yusufu alifasiri ndoto za mhudumu mkuu na mwoka mikate wa nyumba ya Farao, Mwa. 40.
Farao akaanza kumpenda Yusufu kwa sababu Yusufu alifasiri moja kati ya ndoto za Farao; akamfanya Yusufu kuwa mtawala juu ya Misri, Mwa. 41:14–45.
Efraimu na Manase walizaliwa, Mwa. 41:50–52.
Yusufu aliungana tena pamoja na baba yake na kaka zake, Mwa. 45–46.
Yusufu alikufa Misri akiwa na umri wa miaka 110, Mwa. 50:22–26.