សេចក្ដីណែនាំស្តីពីគម្ពីរ យ៉ូហានទី ៣
ហេតុអ្វីសិក្សាគម្ពីរនេះ ?
នៅក្នុងសំបុត្រខ្លីនេះ សាវកយ៉ូហានបានសរសើរដល់កៃយុស ជាសមាជិកសាសនាចក្រម្នាក់ដែលមានភក្ដីភាពកាលមានការបះបោរប្រឆាំងមួយទាស់នឹងថ្នាក់ដឹកនាំសាសនាចក្រ ។ ការបង្រៀនរបស់យ៉ូហានអាចជួយអ្នកឲ្យយល់កាន់តែប្រសើរឡើងពីការក្បត់សាសនាដែលបានកើតឡើងក្នុងសាសនាចក្រនៅជំនាន់ព្រះគម្ពីរសញ្ញាថ្មី ហើយអាចបំផុសគំនិតដល់អ្នកឲ្យបន្តស្មោះត្រង់ចំពោះថ្នាក់ដឹកនាំសាសនាចក្រ មិនថាមានការបដិសេធបែបណានោះទេ ។
តើនរណាបានសរសេរគម្ពីរនេះ ?
អ្នកនិពន្ធបានបង្ហាញខ្លួនលោកថាជា « អ្នកចាស់ទុំ » ( យ៉ូហានទី ៣ ១:១ ) ហើយតាមទម្លាប់ ត្រូវបានស្គាល់ថាជាសាវកយ៉ូហាន ។
តើគម្ពីរនេះត្រូវបានសរសេរឡើងនៅពេលណា ហើយនៅកន្លែងណា ?
គ្មាននរណាម្នាក់ដឹងពិតប្រាកដពីពេលវេលា និងទីកន្លែងដែលយ៉ូហានទី ៣ ត្រូវសរសេរឡើងនោះទេ ។ ប្រសិនបើទម្លាប់នៃការស្នាក់នៅដ៏យូររបស់យ៉ូហាននៅអេភេសូរមានភាពត្រឹមត្រូវ នោះលោកអាចសរសេរសំបុត្រនេះនៅទីនោះនៅចន្លោះ គ.ស. ឆ្នាំ ៧០ និង ១០០ ។
តើគម្ពីរនេះត្រូវបានសរសេរដល់នរណា ហើយតើហេតុអ្វី ?
សំបុត្រទីបីរបស់យ៉ូហានត្រូវបានសរសេរទៅកៃយុស ជាសមាជិកសាសនាចក្រម្នាក់ដែលយ៉ូហានបានសរសើរដោយសារបានបង្ហាញភក្ដីភាពស្មោះស្ម័គ្រចំពោះបុព្វហេតុនៃព្រះគ្រីស្ទ ដោយផ្ដល់ការស្នាក់នៅដល់ពួកអ្នកបម្រើរបស់ព្រះ ពេលពួកលោកធ្វើដំណើរ ( សូមមើល យ៉ូហានទី ៣ ១:៥–៨ ) ។
យ៉ូហានក៏បានព្រមានដល់កៃយុសផងដែរអំពីមនុស្សម្នាក់ដែលមានឈ្មោះឌីអូត្រេព ជាអ្នកដែលមានតួនាទីជាថ្នាក់ដឹកនាំម្នាក់ក្នុងមូលដ្ឋានរបស់សាសនាចក្រ ។ ឌីអូត្រេពបានបដិសេធសាវកយ៉ូហាន និងថ្នាក់ដឹកនាំផ្សេងទៀតរបស់សាសនាចក្រដោយបើកចំហ ហើយថែមទាំងរារាំងសមាជិកសាសនាចក្រក្នុងមូលដ្ឋានដែលចង់ទទួលពួកលោកមិនឲ្យចូលរួមការប្រជុំសាសនាចក្រ ( សូមមើល យ៉ូហានទី ៣ ១:៩–១០ ) ។ យ៉ូហានបានលើកទឹកចិត្តកៃយុសឲ្យបន្តធ្វើសេចក្ដីល្អ ហើយថ្លែងថា លោករំពឹងទុកថា លោកនឹងទៅលេងនឹងកៃយុសឆាប់ៗនេះ ( សូមមើល យ៉ូហានទី ៣ ១:១១–១៤ ) ។
តើគម្ពីរនេះមានលក្ខណៈពិសេសអ្វីខ្លះ ?
នៅក្នុងយ៉ូហានទី ៣ យើងឃើញនូវកង្វល់របស់យ៉ូហានស្ដីពីឥទ្ធិពលនៃការក្បត់សាសនានៅក្នុងសាសនាចក្រ ។ យើងក៏ឃើញផងដែរពីសេចក្ដីស្រឡាញ់របស់លោកមានចំពោះមនុស្សដទៃទៀត និងអំណរដែលលោកមានចំពោះជនដែលជ្រើសជីវិតនៃការគោរពប្រតិបត្តិ ( សូមមើល យ៉ូហានទី ៣ ១:៤ ) ។
គម្រោងមេរៀន
យ៉ូហានទី ៣ ។ យ៉ូហានសរសើរកៃយុសចំពោះសេចក្ដីស្មោះត្រង់របស់គាត់ ហើយបានព្រមានដល់ថ្នាក់ដឹកនាំម្នាក់ដែលបានបដិសេធយ៉ូហាន និងថ្នាក់ដឹកនាំដទៃទៀតរបស់សាសនាចក្រ ។